‘কন্যা সন্তানক নীতিশিক্ষা দিলেই ধৰ্ষণ কমিব’; বিতৰ্কিত মন্তব্য বিজেপি বিধায়কৰ

উত্তৰ প্ৰদেশৰ হাথৰাছৰ দলিত তৰুণীৰ গণধৰ্ষণ আৰু হত্যাকাণ্ডই দেশ তোলপাৰ লগাই থকাৰ সময়তে এক বিতৰ্কিত মন্তব্য কৰিছে উত্তৰ প্ৰদেশৰ এগৰাকী বিজেপি বিধায়কে।

এক সংবাদ প্ৰতিষ্ঠানক দিয়া এটা সাক্ষাৎকাৰত উত্তৰ প্ৰদেশৰ বালিয়াৰ বিধায়ক সুৰেন্দ্ৰ সিঙে কয়, “বিধায়কৰ লগতে মই এজন শিক্ষকো। ধৰ্ষণৰ দৰে ঘটনা বন্ধ কৰিবলৈ সংস্কাৰৰ ভীষণ প্ৰয়োজন। কেৱল আইনৰ দ্বাৰা ধৰ্ষণ বন্ধ কৰিব নোৱাৰি। যেনেদৰে চৰকাৰ সকলোকে নিৰাপত্তা দিবলৈ বদ্ধপৰিকৰ, তেনেকৈ পৰিয়ালে কন্যাসন্তানক নীতিশিক্ষা দিয়া উচিত।”

#WATCH Incidents like these can be stopped with help of good values, na shashan se na talwar se. All parents should teach their daughters good values. It’s only the combination of govt & good values that can make country beautiful: Surendra Singh, BJP MLA from Ballia. #Hathras pic.twitter.com/47AmnGByA3

— ANI UP (@ANINewsUP) October 3, 2020

লগতে তেওঁ আৰু কয়, “এইদৰে হ’লে দেশখন অতি সুন্দৰ হৈ উঠিব। ইয়াৰ কোনো বিকল্প পথ নাই।”

বিজেপিৰ বিধায়ক গৰাকীৰ এই বিতৰ্কিত মন্তব্যৰ পিছতে তুমুল প্ৰতিক্ৰিয়াৰ সৃষ্টি হৈছে দেশত।

ধৰ্ষণৰ বাবে নাৰীৰ নীতিশিক্ষা অভাৱকেই দায়ী বুলি প্ৰতিপন্ন কৰাৰ বৃথা প্ৰচেষ্টা কৰা বুলিও সমালোচিত হৈছে বিতৰ্কিত বিধায়ক গৰাকী।

উল্লেখ্যে ইয়াৰ পূৰ্বেও এই বিতৰ্কিত বিধায়ক গৰাকীয়ে বিতৰ্কিত মন্তব্য কৰি জনৰোষৰ বলি হৈছিল।