মাস্ক স্পৰ্শ কৰিলেই সৰ্বনাশ কৰ’নাৰ! IIT ৰ গৱেষকৰ নতুন আৱিষ্কাৰক লৈ অধীৰ অপেক্ষা

কৰ’নাৰ ভয়াবহ পৰিস্থিতিৰ মাজতে এবিধ নতুন মাস্ক আৱিষ্কাৰক লৈ চলিছে চৰ্চা। ভাৰতীয় গৱেষকৰ আৱিষ্কাৰ এই মাস্কৰ সংস্পৰ্শলৈ আহিলেই কৰ’না ভাইৰাছ ধ্বংস হ’ব বুলি দাবী কৰা হৈছে।

নিজৰ এই আৱিষ্কাৰক লৈ আই আই টি মাণ্ডিৰ গৱেষকৰ দলটোৱে এনে দাবী কৰিছে। তেওঁলোকৰ মতে এই মাস্কে যে কেবল কৰ’না ভাইৰাছৰ পৰাই ৰক্ষা কৰিব এনে নহয়, লগতে মাস্কৰ সংস্পৰ্শলৈ অহা আন ভাইৰাছ-বেক্টেৰিয়াকো ধ্বংস কৰিব।

আমেৰিকাৰ জাৰ্ণাল’আমেৰিকান কেমিকেল ছছাইটি-এপ্লায়েড মেটেৰিয়েল এম্ড ইন্টাৰফেচ’ত তেওঁলোকৰ এই গৱেষণা কথা প্ৰকাশ পাইছে।

আইআইটি মাম্ডিৰ গৱেষক অমিত জয়ছোৱালৰ নেতৃত্বত প্ৰবীণ কুমাৰ, সৌনক ৰায় আৰু অনিতা সৰকাৰে গৱেষণা কৰি উলিয়াইছে এই মাস্ক।

তেওঁলোকে জানিবলৈ দিছে যে এই মাস্ক ম’লিবডেনাম ডাই-ছালফাইড নামৰ উপাদানেৰে তৈয়াৰ কৰা হৈছে। এই উপাদানৰ এডাল চুলিতকৈয়ো পাতল এটা আৱৰণ তৈয়াৰ কৰা হৈছে। মাস্কৰ ওপৰত সেই আৱৰণটো লগাই দিয়া হৈছে।

এই বিশেষ উপাদানেৰে তৈয়াৰ কৰা আৱৰণটোৰ বেক্টেৰিয়া-ভাইৰাছ ধ্বংস কৰাৰ ক্ষমতা আছে বুলি গৱেষকসকলে দাবী কৰিছে।

গৱে,কসকলে জানিবলৈ দিয়ে যে ১০০ৰ পৰা ২০০ নেন’মিটাৰ আয়তনতকৈয়ো ক্ষুদ্ৰ বেক্টেৰিয়া বা ভাইৰাছ এই আৱৰণৰ সংস্পৰ্শলৈ আহিলে তাক ধ্বংস কৰিব। কোভিড-১৯ৰ ভাইৰাছৰ আয়তন ১২০ নেন’মিটাৰ।

তদুপৰি, সূৰ্যৰ পোহৰত এই উপাদান অতি সক্ৰিয় থাকে। সামান্য সূৰ্যৰ পোহৰ পালেইইয়াৰ তাপমাত্ৰা ৭০ ডিগ্ৰী ছেলছিয়াছ হৈ যায়। ফলত ই ভাইৰাছ বৰ্তি থাকিবলৈ নিদিয়ে।

গৱেষকসকলে লগতে জানিবলৈ দিয়ে যে এই মাস্ক একাধিক বাৰ ব্যৱহাৰ কৰিব পৰা যাব। লগতে ৰ’দত দিয়েই এই মাস্ক বীজাণুমুক্ত কৰিব পাৰি। চাবোন পানীত ধুলেও ইয়াৰ কাৰ্যকৰিতা হ্ৰাস নাপায়।

এই মাস্ক এতিয়াও বজাৰলৈ অহা নাই। গৱেষকসকলে সদৰী কৰা মতে আৰু অলপ গৱেষণাৰ পাছতেই ইয়াৰ ফৰ্মূলা বাণিজ্যিক সংস্থাৰ হাতত তুলি দিয়া হ’ব।

প্ৰশ্ন হৈছে অত্যন্ত খৰচী হ’ব নেকি এই মাস্ক? আইআইটিৰ গৱেষকসকলে দাবী কৰা মতে বিশেষভাৱে তৈয়াৰ কৰা এই মাস্কৰ দাম মধ্যবিত্ত শ্ৰেণীৰ সাধ্যৰ ভিতৰতে থাকিব।