অপহৰণৰ স্বৰচিত নাটক কৰি পিতৃক ৩০ লাখ টকাৰ মুক্তিপণ দাবী পুত্ৰৰ, আৰক্ষীৰ অনুসন্ধানত ফাদিল সমগ্ৰ কাণ্ড

উত্তৰ প্ৰদেশৰ কানপুৰত সংঘটিত এক অপহৰণ কাণ্ডই সৃষ্টি কৰিছে তীব্ৰ চাঞ্চল্যৰ। এগৰাকী যুৱকে নিজৰ অপহৰণৰ নাটক কৰি নিজ পিতৃৰ পৰাই দাবী কৰিছে ৩০ লাখ টকাৰ মুক্তিপণ।

ইতিমধ্যে এই স্বৰচিত অপহৰণৰ নাটক কৰি ৰঙাঘৰৰ আলহী হ’বলগীয়া হৈছে যুৱকগৰাকী।অপহৰণকাৰী হিচাপে নিজকে পৰিচয় দি যুৱকজনে এই বৃহৎ অংকৰ মুক্তিপণ দাবীৰে তেওঁৰ পিতৃলৈ হোৱাটছএপ যোগে এক বাৰ্তা প্ৰেৰণ কৰিছিল।

লগতে যদি এই টকা তেওঁ পৰিশোধ নকৰে, তেন্তে তেওঁৰ পুত্ৰক ৩০০ টুকুৰাত কাটি দিয়া হ’ব বুলিও ভাবুকি দিয়ে যুৱকগৰাকীয়ে। কানপুৰৰ বাৰাৰ দামোদৰ নগৰৰ বাসিন্দা চন্দ্ৰকান্ত তিৱাৰীয়ে ১৪ নৱেম্বৰত হোৱাটছএপ যোগে এই বাৰ্তা পোৱাৰ পিছত আৰক্ষীৰ কাষ চাপিছিল।

চন্দ্ৰকান্তই আৰক্ষীৰ আগত সদৰী কৰা অনুসৰি তেওঁৰ পুত্ৰ সোমনাথ তিৱাৰীয়ে জলসিঞ্চন বিভাগত কাম কৰিছিল। ১৩ নৱেম্বৰত তেওঁ পুৱা কামলৈ ৰাওনা হৈছিল যদিও ঘৰলৈ ঘূৰি অহা নাছিল।

পিছদিনা সন্ধিয়া তেওঁলোকে হোৱাটছএপত এটা বাৰ্তা পাইছিল। চন্দ্ৰকান্ত আৰু তেওঁৰ বোৱাৰীয়েকক উদ্দেশ্য কৰি প্ৰেৰণ কৰা বাৰ্তাটোত লিখা আছিল, “যদি আপুনি আপোনাৰ পুত্ৰ আৰু স্বামীক বচাব বিচাৰে, কাইলৈ আবেলি ৪ বজাৰ ভিতৰত ৩০ লাখ টকা সাজু ৰাখিব।”

যদি তেওঁলোকে এই কথা আৰক্ষীক অৱগত কৰে, তেতিয়া অপহৃত পুত্ৰক প্ৰায় ৩০০ টা টুকুৰাত কাটি বিভক্ত কৰি দিয়া হ’ব বুলিও বাৰ্তাটোত ভাবুকি দিয়া হয়।

চন্দ্ৰকান্তৰ অভিযোগৰ ভিত্তিত আৰক্ষীয়ে এক গোচৰ ৰুজু কৰে আৰু তদন্ত আৰম্ভ কৰে। অনুসন্ধাৰ ২৪ ঘণ্টাৰ ভিতৰত আৰক্ষীয়ে সোমনাথ তিৱাৰীয়ে নিজেই নিজৰ অপহৰণৰ ভুৱা কাহিনী ৰচনা কৰাৰ প্ৰমাণ ফাদিল কৰে।

এই সমগ্ৰ পৰিকল্পনাৰ বাবে সোমনাথে ঘাটাঘৰত অৱস্থিত হোটেল তেজছ ইন নামৰ এখন হোটেলত থাকি লৈছিল। আনকি তেওঁ এই অপহৰণক বিশ্বাস কৰাবলৈ নিজৰ পৰিয়ালৰ সদস্যসকললৈ কিছু ভুৱা ফটোও প্ৰেৰণ কৰিছিল।

পিছে আৰক্ষীৰ অনুসন্ধানত এই সমগ্ৰ পৰিকল্পনাৰ কথা ফাদিল হোৱাত সোমনাথৰ ৩০ লাখ টকা জেপত ভৰোৱাৰ আকাংক্ষা মুদা পৰে।