১৭ ফেব্ৰুৱাৰিৰ পৰা পার্বত্য জিলাত অনিৰ্দিষ্টকালীন ৰেইল অৱৰোধ

অহা ১৭ ফেব্ৰুৱাইৰ পৰা অনিৰ্দিষ্ট কালৰ কাৰণে উত্তৰ কাছাৰ পাৰ্বত্য জিলাত ৰেইল অৱৰোধ কাৰ্যসূচী ঘোষণা কৰা হৈছে।

এন চি হিলছ ইণ্ডেজিনাছ স্টুডেন্ট ফ’ৰামে  এই অৱৰোধ কাৰ্যসূচীৰ ঘোষণা কৰিছে। শনিবাৰে হাফলঙত এক সংবাদ মেল পাতি ৰেইল অৱৰোধৰ বিষয়ে ঘোষণা কৰে আইএছএফৰ সভাপতি ডেভিড কেইভম।

কেইভমে কয় যে উত্তৰ-পূব সীমান্ত ৰেইলৱে কৰ্তৃপক্ষই যোৱা পাঁচ বছৰ ধৰি আমাৰ লগত প্ৰতাৰণা কৰি আহিছে।

যোৱা বছৰ মাৰ্চ মাহত ৰেইল অৱৰোধৰ সময়ত ৰাজ্য চৰকাৰৰ মুখ্য সচিবৰ ফালৰ পৰা প্ৰতিশ্ৰুতি পোৱাৰ পাছত অৱৰোধ প্ৰত্যাহাৰ কৰা হৈছিল।

ইয়াৰ পূৰ্বে ২০১৮ চনত কেইবালানিও বৈঠক হয়। উক্ত বৈঠকত তেতিয়াৰ মুখ্য সচিব টি ৱাই দাস উপস্থিত আছিল।

ইয়াৰ পাছত মুখ্য মন্ত্ৰীৰ ফালৰ পৰাও ৰেইল কৰ্তৃপক্ষক ক্ষতিপূৰণৰ ধন মোকোলাই দিয়াৰ  নিৰ্দেশ দিছিল। কিন্তু ৰেইল কৰ্তৃপক্ষই কোনো ধৰণৰ গুৰুত্ব দিয়া নাই।

ডেভিড কেইভমে কয়, ‘উত্তৰ-পূব সীমান্ত ৰেইলৱে কৰ্তৃপক্ষই মুখ্য মন্ত্ৰীৰ নিৰ্দেশ উলঙ্ঘা কৰিছে। যি অত্যন্ত দুৰ্ভাগ্যজনক।’

কেইভমে কয় যে ৰেইল কৰ্তৃপক্ষ পাহাৰীয়া ৰাইজৰ আবেগ অনুভূতিক লৈ খেল খেলিছে। অন্যথা ৪.৫৮ কোটি টকা ক্ষতিপূৰণৰ ধন মোকোলাই দিয়াত ৰেইলৰ সমস্যা ক’ত ?

সাংবাদিকৰ প্ৰশ্নৰ উত্তৰত ডেভিডে স্পষ্ট কৰি দি কয় যে এইবাৰৰ অৱৰোধ লৈ আমি দৃঢ়তাৰে আগ বাঢ়িম। কোনো ধৰণৰ আশ্বাস আমি  মানি নলও। ৰেইলৱে কৰ্তৃপক্ষই ১৬ ফেব্ৰুৱাৰিৰ ভিতৰত ৪.৫৮ কোটি টকাৰ ক্ষতিপূৰণ দিয়াত ব্যৰ্থ হ’লে ১৭ ফেব্ৰুৱাৰিৰ পৰা অনিৰ্দিষ্ট কাললৈ ৰেইল অৱৰোধ গঢ়ি তোলা হ’ব।

উল্লেখ্য যে লামডিং-শিলচৰ ব্ৰডগ’জ নিৰ্মাণৰ কাৰণে ডিমা হাছাও জিলাৰ প্ৰায় পাঁচ শতাধিক পৰিয়াল ক্ষতিগ্ৰস্ত হয়। দুখীয়া পৰিয়াসমূহে নিজৰ ঘৰ-বাৰীৰ লগতে কৃষি ভূমি আদি হেৰুৱাব লগা হৈছে।

কিন্তু দীৰ্ঘ আন্দোলনৰ পাছতো ৰাইজে আজিকোপতি নিজৰ প্ৰাপ্য ক্ষতিপূৰণ লাভ কৰা নাই। এনে পৰিস্থিতিত ৰাইজৰ মাজত ক্ষোভৰ সৃষ্টি হৈছে।