ভাৰত আৰু ভূটানে দ্বিপাক্ষিক বাণিজ্য সম্প্ৰসাৰণৰ বাবে ল’লে সিদ্ধান্ত

ভাৰত আৰু ভূটানে বৃহস্পতিবাৰে অত্যাৱশ্যকীয় সামগ্ৰীৰ আমদানি-ৰপ্তানিৰে দ্বিপাক্ষিক বাণিজ্য সম্প্ৰসাৰণৰ সিদ্ধান্ত গ্ৰহণ কৰিছে।

কেন্দ্ৰীয় কৃষি মন্ত্ৰ্যালয়ৰ বিষয়াসকলে কয় যে ভাৰত আৰু ভূটানৰ মাজত দ্বিপাক্ষিক বাণিজ্যিক সম্পৰ্কত এক উল্লেখযোগ্য সফলতাৰ সূচনা হ’ল।

‘’নেশ্যনেল প্লেন্ট প্ৰটেকশ্যন অ’ৰ্গেনাজেশ্যন (এন পি পি অ’), কেন্দ্ৰীয় কৃষি আৰু কৃষক কল্যাণ মন্ত্ৰ্যালয়, ভূটানৰ কৃষি আৰু খাদ্য নিয়ন্ত্ৰক কৰ্তৃপক্ষ, কৃষি আৰু বন মন্ত্ৰ্যালয়, ৰয়েল গৱৰ্ণমেন্ট অফ ভূটান আৰু ভূটানত থকা ভাৰতীয় দূতাবাসৰ মাজত নিকট সহযোগিতাত ভূটানৰ পৰা ভাৰতলৈ আপেল, আলু, কমলা, আদা, আৰু তামোল আৰু সেইদৰে ভাৰতৰ পৰা ভূটানলৈ বিলাহী, পিঁয়াজ আৰু অ’ক্ৰা সৰবৰাহৰ বাবে বজাৰ মুকলি কৰাৰ সিদ্ধান্ত লোৱা হয়.’’-বিষয়াসকলে কয়।

শেহতীয়াকৈ কোভিড-১৯ মহামাৰীৰ বিৰুদ্ধে যুঁজিবলৈ নতুন দিল্লীয়ে ভূটানক সকলো প্ৰয়োজনীয় সহায় আগবঢ়োৱাৰ আশ্বাস দিয়াৰ পাছতে ভাৰত আৰু ভূটানৰ মাজত সম্পৰ্ক অধিক শক্তিশালী হৈ পৰে।

প্ৰধান মন্ত্ৰী নৰেন্দ্ৰ মোদীয়ে ভূটানৰ ৰজা জিগমে খেছাৰ নামজেয়াল ৱাংচুকৰ সৈতে দেশখনৰ পৰিস্থিতি সম্পৰ্কে টেলিফোন যোগে কথা পাতিছিল।

নেতা দুজনে চুবুৰীয়া তথা বন্ধুত্বপূৰ্ণ হিচাপে ভাৰত আৰু ভূটানৰ মাজত থকা বিশ্বাস আৰু ভালপোৱাৰ অনন্য সম্পৰ্কৰ বিষয়ে কথা পাতিছিল।

এইক্ষেত্ৰত প্ৰধান মন্ত্ৰী নৰেন্দ্ৰ মোদীয়ে কোভিড-১৯ পৰিস্থিতিত ভূটানে গ্ৰহণ কৰা কাৰ্যকৰী ব্যৱস্থাপনাৰ প্ৰশংসা কৰাৰ লগতে ভাৰতে সকলো ধৰণৰ প্ৰয়োজনীয় সহযোগিতা আগবঢ়োৱাৰ প্ৰতিশ্ৰুতি দিছিল।