দেশৰ প্ৰতিৰক্ষা খণ্ডত নৱ সংযোজন: নতুন ব্ৰাহ্ম’জ চুপাৰচনিক ক্ৰুজ মিছাইলৰ সফল পৰীক্ষণ
ভাৰতে আজি উৰিষ্যাৰ বালাচোৰ উপকূলত ব্ৰাহ্ম’ছ চুপাৰচনিক ক্ৰুজ মিছাইলৰ এটা নতুন সংস্কৰণৰ সফল পৰীক্ষা কৰে।
প্ৰতিৰক্ষা সূত্ৰই ৰাষ্ট্ৰীয় সংবাদ সংস্থা এএনআইক কয় যে এই মিছাইলটো নতুন প্ৰযুক্তিগত বিকাশেৰে সজ্জিত আৰু ই সফলতাৰে প্ৰমাণিত হৈছে।
ইয়াৰ পূৰ্বে ১১ জানুৱাৰীত ভাৰতে ভাৰতীয় নৌসেনাৰ আইএনএছ বিশাখাপত্তনম যুদ্ধজাহাজৰ পৰা ব্ৰাহ্ম’ছ চুপাৰচনিক ক্ৰুজ মিছাইলৰ সফল পৰীক্ষা কৰিছিল।
ব্ৰাহ্ম’ছৰ এই নতুন মিছাইল সংস্কৰণ ভাৰত আৰু ৰাছিয়াৰ মাজত এক যৌথ উদ্যোগ। প্ৰতিৰক্ষা গৱেষণা আৰু উন্নয়ন সংস্থা (ডিআৰডিঅ’)ই এই ক্ষেত্ৰত ভাৰতক প্ৰতিনিধিত্ব কৰিছে।
ডিআৰডিঅ’ই এক টুইটযোগে এই সফল পৰীক্ষণৰ কথা সদৰি কৰে। টুইটটোত উল্লেখ কৰা হৈছে, “ব্ৰাহ্ম’ছ মিছাইলৰ আজি চান্দিপুৰৰ আইটিআৰৰ পৰা সফলতাৰে পৰীক্ষা কৰা হৈছে। অভিযানটোৱে বহুতো নতুন থলুৱা প্ৰণালীক সফলতাৰে বৰ্ধিত ক্ষমতা প্ৰদৰ্শন কৰি বৈধতা প্ৰদান কৰিছে।”
BrahMos Missile was successfully test fired from ITR, Chandipur today. The mission validated many new indigenous systems successfully demonstrating enhanced capabilities. #MakeinIndia@DefenceMinIndia@BrahmosMissile@SpokespersonMoD#AtmaNirbharBharat pic.twitter.com/bHS7t24gSd
— DRDO (@DRDO_India) January 20, 2022
ব্ৰাহ্ম’ছ হৈছে ভাৰতীয় নৌসেনাৰ যুদ্ধজাহাজৰ মুখ্য অস্ত্ৰ প্ৰণালী আৰু প্ৰায় সকলো পৃষ্ঠমঞ্চত ব্ৰাহ্ম’ছক মোতায়েন কৰা হৈছে।
পানীৰ তলত ব্যৱহাৰ কৰিব পৰাকৈ ব্ৰাহ্ম’ছৰ আন এটা সংস্কৰণো বিকশিত কৰা হৈছে। এই সংস্কৰণটো বন্ধুত্বপূৰ্ণ বিদেশী ৰাষ্ট্ৰসমূহলৈ ৰপ্তানিৰ বাবেও আগবঢ়োৱা হ’ব।