কপিল-শচীনৰ স্মৃতি বিজৰিত ৰেট্ৰ’ জাৰ্চিৰে অষ্ট্ৰেলিয়াত সাজু ধাৱান

আৰু কিছুদিন পিছত আৰম্ভ হ’ব ভাৰত আৰু অষ্ট্ৰেলিয়াৰ মহাৰণ। বেট আৰু বলৰ সমান্তৰালকৈ কোহলী আৰু স্মিথৰ মাজত হ’ব শ্ৰেষ্ঠত্বৰ যুঁজ।

অষ্ট্ৰেলিয়াৰ বিৰুদ্ধে ভাৰতে তিনিখন এদিনীয়া, তিনিখন টি-২০ আৰু চাৰিখন টেষ্ট মেচ খেলিব।

অহা ২৭ নৱেম্বৰত ভাৰতে এদিনীয়া মেচেৰে অষ্ট্ৰেলিয়া ভ্ৰমণৰ অভিযান আৰম্ভ কৰিব। এদিনীয়া শৃংখলাটোত ভাৰতে নতুন জাৰ্চিৰে ফিল্ডত নামিব।

নতুন জাৰ্চিত থাকিব ৰেট্ৰ’(পুৰণি) লুক। ইতিমধ্যে ভাৰতে পিন্ধিবলগীয়া এই জাৰ্চি মুকলি কৰিছে।

ভাৰতীয় দলৰ অপেনাৰ শিখৰ ধাৱানে এই নতুন জাৰ্চি পিন্ধি নিজৰ টুইটাৰত এখন ছবি শ্বেয়াৰ কৰিছে। এইদৰে নতুন স্পনছৰৰ লগ’ থকা জাৰ্চিত প্ৰথমবাৰৰ বাবে দেখা গ’ল কোনো ভাৰতীয় ক্ৰিকেটাৰক।

উল্লেখ্য যে, এই নতুন জাৰ্চিটো ১৯৯২ চনৰ বিশ্বকাপত ভাৰতীয় দলে পিন্ধা জাৰ্চিৰ আৰ্হিত প্ৰস্তুত কৰা হৈছে। যি জাৰ্চি পিন্ধি খেলিছিল শচীন টেণ্ডুলকাৰ, কপিল দেৱৰ দৰে ক্ৰিকেটাৰে।

ভাৰতৰ নতুন জাৰ্চি অৰ্থাৎ ধাৱানৰ পৰা দেখা পোৱা জাৰ্চিটো দেখিলে বিশ্বাস কৰিবলৈ টান যে এইটো ১৯৯২ চনৰ নে ২০২০ৰ জাৰ্চি।

ডাঠ নীলা আৰু কান্ধত চাৰিডাল ভিন্ন ৰঙৰ দীঘল পতিৰ এই জাৰ্চি পিন্ধি এসময়ত ফিল্ডত দেখা পোৱা গৈছিল কপিল দেৱৰ লগতে আন আন ক্ৰিকেটাৰ সকলক।

১৯৯২ চনৰ বিশ্বকাপত প্ৰখমবাৰৰ বাবে ৰঙীন জাৰ্চি পৰিধান কৰিছিল দেশসমূহে।

আৰু সেই ভাৰতীয় দলৰ জাৰ্চিৰ আৰ্হিত প্ৰস্তুত কৰা জাৰ্চিৰে অহা ২৭ নৱেম্বৰত ভাৰতে অষ্ট্ৰেলিয়াৰ বিৰুদ্ধে অৱতীৰ্ণ হ’ব।

New jersey, renewed motivation. Ready to go. 🇮🇳 pic.twitter.com/gKG9gS78th

— Shikhar Dhawan (@SDhawan25) November 24, 2020