নাবালিকাক খাদ্যত বাদাম দি পৰিৱেশন কৰি ৰেষ্টুৰেন্টে ভৰিলে ৩.৫লাখ টকাৰ জৰিমনা
এগৰাকী নাবালিকা ছোৱালীক খাবলৈ দিয়া খাদ্যত বাদাম দি বিপদত পৰিল এখন ৰেষ্টুৰেন্ট। ব্ৰিটেইনৰ ৰাজধানী লণ্ডনৰ এখন ভাৰতীয় ৰেষ্টুৰেন্টত সংঘটিত হৈছে এই ঘটনা।
শুকান ফল (ড্ৰাই ফ্ৰুটছ)ৰ পৰা হোৱা এলাৰ্জীৰ কাৰণে ছোৱালীজনীৰ স্বাস্থ্যৰ অৱনতি ঘটাত স্থানীয় প্ৰশাসনে ৰেষ্টুৰেন্টখনৰ ওপৰত ৩ হাজাৰ ৭৬৭ পাউণ্ড অৰ্থাৎ প্ৰায় তিনি লাখ পঞ্চাশ হাজাৰ টকাৰ জৰিমনা বিহে।
ডেইলী মেইলৰ বাতৰি অনুসৰি ন্যুকছেলৰ সমীপৰ টাইনমাউথৰ এখন ভাৰতীয় ৰেষ্টুৰেন্ট “গুলছন’ত এগৰাকী ১৬বছৰীয়া ছোৱালী পৰিয়ালৰ সৈতে খোৱাৰ বাবে উপস্থিত হয়। তাত কৰ্মচাৰীসকলে তাইক তেওঁলোকৰ খাদ্য সজীৱ আৰু সুৰক্ষিত বুলি আশ্বাস দিয়ে।
ড্ৰাইফুটছৰ পৰা এলাৰ্জী হোৱাৰ কাৰণে ছোৱালীজনীয়ে খোৱাৰ পাছতেই জিভাত জিনজিননি আৰু জ্বলন আৰম্ভ হয়। লগে লগে ছোৱালীজনীক নৰ্থ টাইনছাইড জেনেৰেল হাস্পাতলত চিকিৎসাৰ বাবে ভৰ্তি কৰোৱা হয়।
ঘটনাটোৰ তদন্ত কৰিবলৈ উপস্থিত হোৱা স্থানীয় প্ৰশাসনৰ খাদ্য সুৰক্ষা বিষয়াই যেতিয়া খাবলৈ দিয়া “চিকেন কাৰী’ৰ অৱশিষ্ট পৰীক্ষণ কৰে, তাত বাদামৰ প্ৰ’টিন থকাটো ধৰা পৰে যাৰ বাবে ছোৱালীজনীৰ স্বাস্থ্যৰ অৱনতি ঘটে।
ৰেষ্টুৰেন্টত শিশুক ভ্ৰান্ত ব্যাখ্যা দি খাদ্য পৰিৱেশন কৰা আৰু কেইটামান অৱহেলা-অসাৱধানতা অৱলম্বন কৰাৰ অভিযোগত প্ৰশাসনে গুলছন ৰেষ্টুৰেন্টক প্ৰায় চাৰে তিনি লাখ টকাৰ জৰিমনা বিহে।