“ট্ৰেইন লেইট” হ’লে ক্ষতিপূৰণৰ টকা পাব যাত্ৰীয়ে; ভাৰতত প্ৰথমবাৰৰ বাবে এই নিয়ম!

ভাৰতৰ প্ৰথমখন ব্যক্তিগত খণ্ডৰ ট্ৰেইন দিল্লী-লক্ষ্ণৌ তেজছ এক্সপ্ৰেছে অহা ৪ অক্টোবৰত ইয়াৰ যাত্ৰাৰ শুভাৰম্ভ কৰাৰ পূৰ্বে ভাৰতীয় ৰেইলসেৱাত যাত্ৰীক বিলম্বিতাৰ বাবে ক্ষতিপূৰণ দিয়াৰ নতুন নীতি সংযোজন কৰিছে।

ৰেইলখন নিৰ্ধাৰিত সময়তকৈ বিলম্বিত সূচীত চলিলে কৰ্তৃপক্ষই ইয়াৰ যাত্ৰীসকলক এটা আনুপাতিক পৰিমাণত টকা ঘূৰাই দিব বুলি ১ অক্টোবৰত ঘোষণা কৰে।

দেশত যিকোনো পৰিবহণ ব্যৱস্থাই এনেকুৱা নীতি লোৱা এইটো প্ৰথম উদাহৰণ।

ঘোষণাটো মতে, এঘণ্টাতকৈ অধিক সময় লেইট হ’লে ১০০ টকাকৈ আৰু দুঘণ্টাতকৈ অধিক সময় লেইট হ’লে যাত্ৰীক ২৫০ টকাকৈ ঘূৰাই দিব ৰেইলখনে।

আই আৰ চি টি চিয়ে ঘোষণাটোত আৰু কয় যে যাত্ৰীক বিনামূলীয়াকৈ ২৫ লাখ টকাৰ ভ্ৰমণ বীমা আগ বঢ়োৱা হ’ব।
এই ভ্ৰমণ বীমাত অন্তৰ্গত থাকিব ভ্ৰমণৰ সময়ত ট্ৰেইনত থকা যাত্ৰীৰ বয়বস্তুৰ চুৰি বা ডকাইতিৰ ফলত হোৱা ক্ষতিও।

যাত্ৰীক বিলম্বিতাৰ বাবে ক্ষতিপূৰণ দিয়াৰ নিয়ম জাপান, ফ্ৰান্স আদি কিছু দেশত আছে যদিও ভাৰতত তেনেকুৱা নিয়ম এই পৰ্য্যন্ত নাই।

ৰেইলখনে অহা ৫ অক্টোবৰত ইয়াৰ বাণিজ্যিক যাত্ৰা আৰম্ভ কৰিব আৰু দিল্লীৰ পৰা লক্ষ্ণৌলৈ যোৱাৰ বাটত মাত্ৰ এটা ষ্টেইশ্যনত (কানপুৰ) ৰ’ব।

৫০০ কিলোমিটাৰতকৈ কিছু কম দূৰত্বৰ এই ভ্ৰমণত ৰেইলখনে যাত্ৰীৰ পৰা এ চি চেয়াৰ কাৰ ছীটৰ ভাৰা ল’ব ১,১২৫ টকা আৰু এক্সিকিউটিভ চেয়াৰ কাৰত ২৩১০ টকাকৈ।