ইংলেণ্ড টেষ্টৰ বাবে ভাৰতীয় দল ঘোষণা; কোন আহিল, কোন গ’ল? দলত নতুন উইকেটকীপাৰ

ভাৰতীয় দলটোৱে আফগানিস্তানৰ বিৰুদ্ধে তিনিখন খেলৰ টী-২০ শৃংখলা খেলি আছে। ইয়াৰ পিছতে ঘৰৰ মাটিত ইংলেণ্ডৰ বিৰুদ্ধে খেলিব পাঁচখন খেলৰ টেষ্ট শৃংখলা। এই শৃংখলাটো বিশ্ব টেষ্ট চেম্পিয়নশ্বিপৰ অন্তৰ্গত। ভাৰতীয় ক্ৰিকেট ব’ৰ্ডে প্ৰথম দুখন টেষ্টৰ বাবে দল ঘোষণা কৰিছে।

ভাৰতীয় দলৰ বিধ্বংসী পেচাৰ মহম্মদ ছামি দলত নাই।  আঘাতৰ বাবে আনকি দক্ষিণ আফ্ৰিকা ভ্ৰমণতো নাছিল ছামি। শেহতীয়াকৈ অৰ্জুন বঁটা লাভ কৰা ছামি প্ৰথম দুখন মেচত খেলিব নোৱাৰিব বুলিও ইংগিত পোৱা গৈছিল।

আন এগৰাকী বেটছমেন অভিমন্যু ঈশ্বৰনকো বাহিৰত ৰখা হৈছে। তেওঁ ভাৰত-এ দলটোক নেতৃত্ব দিব। অভিমন্যু দক্ষিণ আফ্ৰিকাৰ বিৰুদ্ধে টেষ্ট দলত আছিল যদিও ইংলেণ্ডৰ বিৰুদ্ধে স্থান নাপালে।

লগতে পঢ়কঃ নট আউট ১১২! ইতিমধ্যে ৭ বাৰ বিবাহিত, তাৰ পিছতো পুনৰ বিয়াত বহিব বিচাৰে এই ‘যুৱতী’!

দক্ষিণ আফ্ৰিকাৰ টেষ্ট দলত আছিল ঈশান কিষান। তেওঁৰ খেল নিশ্চিত আছিল। ব্যক্তিগত কাৰণত হঠাৎ দলৰ পৰা নিজৰ নাম আঁতৰাই পেলালে এই উইকেটকীপাৰ বেটছমেনে। কীপিং কৰে লোকেশ ৰাহুলে।

আফগানিস্তানৰ বিৰুদ্ধে টী-২০ দলত স্থান নোপোৱা ঈশানক লৈ বহু জল্পনা-কল্পনাৰ সৃষ্টি হৈছে। ডিপ্ৰেছনৰ বাবে তেওঁ ছুটী লৈছিল বুলি দলটোৱে জনাইছিল। সূত্ৰ সমূহৰ মতে ঈশানক ৰঞ্জী ট্ৰফীলৈ ঘূৰি অহাৰ কথা কোৱা হৈছিল।

ফৰ্মৰ বাহিৰত থকা শ্ৰেয়াছ আয়াৰৰ ক্ষেত্ৰতো একেই কথা কোৱা হৈছিল। শ্ৰেয়াছে ৰঞ্জী খেলিছে। কিন্তু শ্ৰেয়াছ দলত থাকিল। ঈশান অৱশ্যে খেলপথাৰলৈ উভতি নাহিল। নতুন উইকেটকীপাৰ বেটছমেন ধ্ৰুৱ জুৰেলক দলত সুযোগ দিয়া হৈছে।

লোকেশ ৰাহুলে দক্ষিণ আফ্ৰিকাত টেষ্টত কীপিং ৰাখিছিল যদিও তেওঁ বিশেষজ্ঞ উইকেটকীপাৰ নহয় বাবে তেওঁৰ ওপৰত অতিৰিক্ত চাপ পৰিছিল। সেইবাবেই ব’ৰ্ডে ইংলেণ্ডৰ বিৰুদ্ধে পাঁচখন মেচৰ শৃংখলাৰ বাবে তেওঁক কীপিঙৰ পৰা ৰেহাই দিয়াৰ কথা ভাবিছে। ৰাহুলে বেটছমেন হিচাপে খেলিব। সেয়া হ’লে ধ্ৰুৱ জুৰেলেও হয়তো টেষ্টত অভিষেক ঘটাব।

লগতে পঢ়কঃশাৰীৰিক সম্পৰ্ক অস্বীকাৰ মানসিক নিষ্ঠুৰতা; বিবাহ বিচ্ছেদ বিচাৰিব পাৰে স্বামীয়ে! উচ্চ ন্যায়ালয়

দলটোত আন এজন উইকেটকীপাৰ শ্ৰীকৰ ভাৰত আছে যদিও দলটোৱে তেওঁৰ ওপৰত এতিয়াও ভৰসা কৰা নাই। ভাৰতে চাৰিজন স্পিনাৰক দলত ৰাখিছে। বহুদিনৰ মূৰত টেষ্ট দলত ঘুৰি আহিছে কুলদীপ যাদৱ।

প্ৰথম দুখন টেষ্টৰ বাবে ভাৰতৰ দল- ৰোহিত শৰ্মা (অধিনায়ক), শুভমন গিল, যশস্বী জয়ছোৱাল, বিৰাট কোহলী, শ্ৰেয়াছ আয়াৰ, লোকেশ ৰাহুল (উইকেটকীপাৰ), শ্ৰীকৰ ভাৰত (উইকেটকীপাৰ), ধ্ৰুৱ জুৰেল (উইকেটকীপাৰ), ৰবিচন্দ্ৰন অশ্বিন, ৰবীন্দ্ৰ জাডেজা, অক্ষৰ পেটেল , কুলদীপ যাদৱ, মহম্মদ চিৰাজ, মুকেশ কুমাৰ, যশপ্ৰীত বুমৰাহ (ভাইচ কেপ্তেইন), আবেশ খান।