ভাৰত-বাংলা সীমান্ত বেৰাৰ দুঃশ্চিন্তা এৰি ভোট দিব পাৰিব ’২১ৰ নিৰ্বাচনত

অসমৰ ৰাজনীতিৰ যোৱা কেইবাটাও দশকৰ ইছু– বাংলাদেশৰ সৈতে সীমান্ত ছীল–ৰ দুঃশ্চিন্তা এৰি ৰাইজে ’২১ৰ বিধান সভা নিৰ্বাচনত ভোট দিব পাৰিব।

বিজেপি নেতৃত্বাধীন কেন্দ্ৰীয় চৰকাৰে ২০২০ চনৰ ডিচেম্বৰৰ ভিতৰত সম্পূৰ্ণ কৰিব ভাৰত-বাংলা সীমান্ত ছীলৰ কাম।

নৰেন্দ্ৰ মোদীৰ আগৰখন কেন্দ্ৰীয় চৰকাৰে ২০২০ চনৰ মাৰ্চৰ ভিতৰত এই নিৰ্মাণ সম্পূৰ্ণ হোৱাৰ কথা কৈছিল যদিও নতুন সময়সীমা হৈছে ডিচেম্বৰ, ২০২০ (।)

“বাকী থকা ১৬৯.৬৪ কিঃ মিঃ ২০২০ৰ ডিচেম্বৰৰ ভিতৰত ছীল কৰা হ’ব,” ২৮০৩.০১৩ কিঃ মিঃ সীমা ইতিমধ্যে ছীল কৰা বুলি উল্লেখ কৰি শেহতীয়াকৈ কেন্দ্ৰীয় গৃহ ৰাজ্য মন্ত্ৰী নিত্যানন্দ ৰায়ে দিয়া বিবৃতিত প্ৰকাশ।

তেওঁ জনাই যে, ৪০৯৬ কিঃ মিঃ দৈৰ্ঘ্যৰ ৩৩২৬.১৪ কিঃ মিঃ এলেকাত ফেন্সিং নিৰ্মাণৰ অনুমোদন জনোৱা হৈছে।

সীমান্তৰ বহু এলেকাত থকা নদীসমূহেৰে প্ৰব্ৰজন বন্ধ কৰাৰ বাবে চৰকাৰে “প্ৰযুক্তিগত” ব্যৱস্থা হাতত ল’ব।

“সীমান্ত এলেকাসমূহত সীমা পহৰা চকীসমূহৰ বিপদসাধ্যতা জৰীপ, নিৰীক্ষণকাৰী সঁজুলি যোগান, চোৰাংচোৱা নেটৱৰ্ক শক্তিশালীকৰণ, বিপদসাধ্য এলেকাত সুৰংগ-ৰোধী পদক্ষেপ আৰু অসুবিধাজনক ঠাই যেনে নদী এলেকাসমূহত প্ৰযুক্তিগত সমাধান যোগানৰো ব্যৱস্থা গ্ৰহণ কৰা হৈছে,” তেওঁ জনায়।

মন্ত্ৰীজনে জনাই যে, সীমান্তৰে হোৱা প্ৰব্ৰজন ৰোধাৰ বাবে চৰকাৰে এক বহুদিশীয়া পদ্ধতি গ্ৰহণ কৰিছে।

“…ইয়াৰ ভিতৰত আছে আন্তঃৰাষ্ট্ৰীয় সীমাত সীমা সুৰক্ষা দল নিয়োগ, সীমান্ত ফেন্সিং আৰু ফ্লাদ লাইটৰ ব্যৱস্থা, সীমান্তত তহল, সীমা নিৰীক্ষণ চকীসমূহত জোৱান নিয়োগ…,” ৰায়ে কয়।

যোৱা ১৮ ডিচেম্বৰত তদানীন্তন গৃহ ৰাজ্য মন্ত্ৰী কিৰেন ৰিজেজুৱে ২০২০ৰ মাৰ্চৰ ভিতৰত সীমান্তৰ বেৰ নিৰ্মাণ সম্পূৰ্ণ হোৱাৰ কথা কৈছিল।

গৃহ বিভাগৰ তথ্য মতে, যোৱা ডিচেম্বৰলৈকে ভাৰত-বাংলা সীমাৰ ২৭৮৫.৫৫৪ কিঃমিঃত বেৰ নিৰ্মাণ সম্পূৰ্ণ হৈছিল।