ধিক মানৱতা! ৰাজপথত পৰি থাকিল আঘাতপ্ৰাপ্ত কিশোৰী; সহায়ৰ সলনি ফটো তোলাত ব্যস্ত থাকিল সকলো

উত্তৰ প্ৰদেশৰ কনৌজত সংঘটিত হৈছে মানৱতাক লজ্জানত কৰা এক ঘটনা। উত্তৰ প্ৰদেশৰ কনৌজৰ চৰকাৰী অতিথিশালাৰ সমীপত ক্ষত-বিক্ষত শৰীৰ লৈ ছটফটাই পৰি আছিল এগৰাকী ১৩ বছৰীয়া কিশোৰী।

যোৱা দেওবাৰৰ পৰা নিজৰ ঘৰৰ পৰা নিৰুদ্দেশ হৈ আছিল কিশোৰীগৰাকী। কিশোৰীগৰাকীৰ শৰীৰৰ কেইবা ঠাইৰ পৰা ওলাই আছিল তেজ। মূৰতো আছিল গভীৰ আঘাতৰ চিন। পীড়িতা কিশোৰীগৰাকীয়ে বহুপৰ ধৰি সহায়ৰ কাতৰ আৰ্তনাদেৰে পৰি আছিল পথৰ দাঁতিত। ক্ৰমশঃ কিশোৰী গৰাকীক চাবলৈ চাৰিওফালে ভিৰ বাঢ়িল স্থানীয় লোক আৰু বাটৰুৱাৰ।

লগতে পঢ়ক: এগৰাকী ব্ৰিটিছ প্ৰধানমন্ত্ৰীয়ে গান্ধীক কৈছিল নঙঠা ফকীৰ; এতিয়া তেওঁৰ দেশ চলাব ভাৰতীয় বংশোদ্ভূত ‘ঋষি’য়ে

সকলো লোকে বেৰি ধৰিলে অসহায় কিশোৰীগৰাকীক। কিন্তু কিশোৰীগৰাকীক সহায়ৰ হাত আগবঢ়োৱাৰ সলনি সকলোৱে পকেটৰ পৰা মবাইল ফোন উলিয়াই ব্যস্ত হৈ পৰিল ফটো তোলাত। সহায়ৰ বাবে আগবাঢ়ি নাহিল এজনো প্ৰত্যক্ষদৰ্শী। এতিয়া সামাজিক মাধ্যমত ভাইৰেল হৈ পৰিছে সেই সমগ্ৰ দৃশ্য।

ভিডিঅ’ কৰি থকাৰ পৰাই কোনোবা এজনে কৈছে – “পুলিচ ক’ত?” আন এজনে কাৰোবাক পুলিচৰ ফোন নম্বৰ বিচাৰিছে। ভিডিঅ’টোত হূলস্থূলীয়া পৰিৱেশৰ মাজতে শুনা গৈছে এনেধৰণৰ দুই এটা বাক্য।

লগতে পঢ়ক: চুনাক ব্ৰিটেইনৰ মচনদত বহাৰ সময়তে নেটিজেনৰ দাবী-‘ঘুৰাই দিয়ক কহিনুৰ, মোদী, মালিয়াক’!

অৱশেষত বহুপৰ পিছত আহিল এজন আৰক্ষী জোৱান। আৰক্ষী জোৱানজনে আহিয়েই ততাতয়াকৈ কিশোৰীগৰাকীক কোচত তুলি এখন অটোৰ ফালে দৌৰিছে। এই সমগ্ৰ দৃশ্য বন্দী হৈ ৰ’ল চিচি টিভি কেমেৰাত।

ইফালে আন এটা চিচি টিভি কেমেৰাৰ ভিডিঅ’ও সামাজিক মাধ্যমত বিয়পি পৰিছে। য’ত দেওবাৰৰ দিনা এজন অচিনাক্ত যুৱকৰ সৈতে ৰাস্তাৰে গৈ থকা অৱস্থাত কিশোৰীগৰাকীক দেখা পোৱা গৈছে। ইতিমধ্যে কনৌজ আৰক্ষীয়ে সেই যুৱকজনৰ ফটো সামাজিক মাধ্যমত ৰাজহুৱা কৰিছে আৰু যুৱকজনক কৰায়ত্ত কৰাৰ বাবে প্ৰচেষ্টা চলাই আছে।

লগতে পঢ়ক:Solar Eclipse: আজি খণ্ডগ্ৰাস সূৰ্যগ্ৰহণ; দেশৰ কোন চহৰত কিমান সময় দেখা যাব গ্ৰহণ?

চিচি টিভিত দেখা পোৱা এই যুৱকজনেই এই অপৰাধৰ লগত জড়িত থকাৰ সন্দেহ আৰক্ষীৰ। কিশোৰী গৰাকী বৰ্তমান চিকিৎসাধীন অৱস্থাত আছে। কিশোৰীগৰাকী ধৰ্ষণৰ বলি হৈছিল নে নাই সেই কথা এতিয়ালৈকে পোহৰলৈ অহা নাই ।