ওদালগুৰিৰ মাজবাট কলেজৰ কোৱাৰেন্টাইন চেন্টাৰত থকা একাংশ লোকে চলালে উদ্ভণ্ডালি
মাজবাট কলেজৰ কোৱাৰেন্টাইনত থকা একাংশ লোকে শুকুৰবাৰে এক অপ্ৰীতিকৰ পৰিস্থিতিৰ সৃষ্টি কৰে।
চেন্টাৰটোত থকা তিনিজন লোকৰ কোভিড-১৯ পজিটিভ ধৰা পৰাৰ পাছত তেওঁলোকক ঘৰলৈ যাবলৈ অনুমতি নিদিয়াৰ বাবে প্ৰতিষ্ঠানটোৰ কিছুমান বিচনা তথা আচবাব জ্বলাই দিয়ে।
চেন্টাৰটোৰ আৱাসীসকলে আচবাবসমূহ জ্বলাই দিয়াৰ ভিডিঅ’ ছচিয়েল মিডিয়াত ভাইৰেল হৈ পৰে।
চেন্টাৰটোৰ এনে অবাঞ্চিত ঘটনা পাছত মাজবাট ৰাজহ চক্ৰ বিষয়া ধৃতিমান দাসে নিয়ন্ত্ৰণ কৰিবলৈ সক্ষম হয়।
ইয়াৰ মাজতে, মাজবাটৰ চাৰিজন লোকৰ দেহত কোভিড-১৯ পজিটিভ ধৰা পৰিছে আৰু সেইদৰে ওদালগুৰিত মুঠ কৰ’না আক্ৰান্তৰ সংখ্যা ৬৫ জনলৈ বৃদ্ধি পাইছে।
নতুনকৈ আক্ৰান্ত চাৰিজনৰ ভিতৰত তিনিজন হৈছে মাজবাট কলেজৰ কোৱাৰেন্টাইন চেন্টাৰৰ।
চতুৰ্থগৰাকী ৰোগী হৈছে এগৰাকী সাতমহীয়া গৰ্ভৱতী মহিলা।
আটাইকেইজন আক্ৰান্ত ৰোগীয়ে বৰ্তমান ওদালগুৰি অসামৰিক হাস্পাতলৰ আইছ’লেশ্যন ৱাৰ্ডত চিকিৎসাধীন হৈ আছে।
মাজবাট কলেজৰ কোৱাৰেন্টাইন চেন্টাৰত মুঠ ৭৭জন লোক আছে।