CAB বাতিলৰ দাবীত ৰে’লপথ-ৰাষ্ট্ৰীয় ঘাইপথ অৱৰোধেৰে উত্তাল প্ৰতিবাদ

বুধবাৰে কেন্দ্ৰীয় কেবিনেটে নাগৰিকত্ব বিধেয়কক অনুমোদন জনোৱাৰ প্ৰতিবাদত ইণ্ডিজেনাছ নেশ্যনেলিষ্ট পাৰ্টি অব ত্ৰিপুৰা চমুকৈ আই এন পি টিয়ে ৰে’লপথ আৰু ৰাষ্ট্ৰীয় ঘাইপথ অৱৰোধেৰে উত্তাল প্ৰতিবাদী কাৰ্যসূচী গ্ৰহণ কৰিছে।

নিশাৰ পৰাই বাহৰ পাতি থকা দলটোৰ একাধিক সদস্যই আজি ৰাতিপুৱা খামটিং বাৰিত একত্ৰিত হৈ ৰাষ্ট্ৰীয় ঘাইপথ অৱৰোধ কৰে। ইয়াৰ পিছত সদস্য সকলে কেব বাতিলৰ দাবীত বিভিন্ন বেনাৰ পোষ্টাৰ লৈ ৰে’লপথ অৱৰোধ কৰে।

উল্লেখ্য যে ৰাজ্যখনৰ এটা উল্লেখনীয় আঞ্চলিক তথা জনজাতীয় দল আই এন পি টিয়ে বিধেয়কখনৰ বিৰুদ্ধে যোৱা বছৰৰ পৰা ধাৰাবাহিকভাৱে বিভিন্ন প্ৰতিবাদী কাৰ্যসূচী গ্ৰহণ কৰি আহিছে।

জাতি, ভাষা, কৃষ্টি-সংস্কৃতিৰ বাবে ভাবুকি স্বৰূপ এই বিধেয়খন বাতিলৰ দাবীত সংগঠনটোৱে আহ্বান জনোৱা ১২ ঘণ্টীয়া অৱৰোধ কাৰ্যসূচীত যাতে কোনো ধৰণৰ অপ্ৰীতিকৰ ঘটনা সংঘটিত নহয় তাৰ বাবে যথেষ্ট সংখ্যক সুৰক্ষাকৰ্মীক নিয়োগ কৰা হৈছে।

জানিব পৰা মতে ৰাতিপুৱা ৬ বজাৰ পৰা আৰম্ভ হোৱা অৱৰোধ কাৰ্যসূচীৰ বাবেই পুৱাৰ ভাগত চলা ৰে’ল সমূহ বাতিল কৰিবলৈ বাধ্য হয়। তদুপৰি অসম-আগৰতলা ৰাষ্ট্ৰীয় ঘাইপথৰে চলা বাহন সমূহো অৱৰোধ কৰিছে প্ৰতিবাদকাৰীয়ে।

দলটোৰ সাধাৰণ সম্পাদক জগদীশ দেববাৰ্মাই কয়, ‘কেন্দ্ৰীয় কেবিনেটে কেবক অনুমোদন জনালে। দীৰ্ঘদিন ধৰি উত্তৰ-পূবৰ দল-সংগঠন সমূহে ইয়াৰ বিৰোধিতা কৰি অহাৰ পিছতো কেব গৃহীত কৰিবলৈ ওলাইছে। খিলঞ্জীয়াৰ অস্তিত্বৰ প্ৰতি ভাবুকি নমাই আনিব লগীয়া এই বিধেয়কখন বাতিল কৰিবলৈ পুনৰবাৰ কেন্দ্ৰীয় চৰকাৰক আহ্বান জনাইছো’।