কাৰ্য্যালয়ৰ তলা খুলিবলৈ গৈ চতুৰ্থ মহলাৰ পৰা পিছলি পৰি কৰুণ মৃত্যু জলসিঞ্চন বিভাগৰ কৰ্মচাৰীৰ

দিনটোৰ কৰ্তব্য আৰম্ভ কৰিবলৈ গৈ মহানগৰীৰ চানমাৰিস্থিত জলসিঞ্চন বিভাগৰ কাৰ্য্যালয়ৰ চতুৰ্থ মহলাৰ পৰা পৰি থিতাতে কৰুণ মৃত্যুক সাৱটি ল’লে বিভাগটোৰ এজন কৰ্মচাৰীয়ে। ঘটনাটো ঘটে পুৱা ৯.৩০ বজাত।

এই কৰুণ ঘটনাত জীৱন হেৰুওৱা দুৰ্ভগীয়া কৰ্মচাৰীজনৰ নাম কনক চন্দ্ৰ ৰাভা (৫৮) বুলি জানিব পৰা গৈছে। মহানগৰীৰ হাতীগাঁও নিৱাসী ৰাভা বিভাগটোৰ ইলেকট্ৰিকেল শাখাত কৰ্মৰত আছিল।

বিভাগটোৰ কৰ্মচাৰীসকলে জনোৱামতে, ৰাভাই কাৰ্য্যালয় বিল্ডিঙৰ চতুৰ্থ মহলাৰ এটা কোঠাৰ তলা খুলিবলৈ যাওঁতেই ওপৰৰ পৰা পিছলি পৰে। একেবাৰে তলৰ পকাৰ ওপৰত মূৰ তল কৰি পৰি যোৱা ৰাভাই থিতাতেই প্ৰাণ হেৰুৱায়। চতুৰ্থ মহলাত ৰেলিং নাছিল।

মৃতদেহটো মৰণোত্তৰ পৰীক্ষাৰ বাবে গুৱাহাটী মেডিকেল কলেজ আৰু হস্পিটেললৈ নিয়া হৈছে।