অসমৰ পাছত ঝাৰখণ্ডটো প্ৰথম গৰাকী ক’ৰ’নাত আক্ৰান্তক চিনাক্ত; মছজিদত আশ্ৰয় লৈ আছিল মালেছিয়ান মহিলা গৰাকী

অসমৰ পাছত ঝাৰখণ্ডতো আজি ৰাজ্যখনৰ প্ৰথমগৰাকী ক’ৰ’না ভাইৰাছ পজিটিভ ৰোগী চিনাক্ত হৈছে।

ঝাৰখণ্ডৰ ৰান্সীৰ এটা মছজিদত বাহৰ পাতি থকা মালেছিয়াৰ মহিলা এগৰাকীৰ শৰীৰত ক’ৰ’না ভাইৰাছৰ উপস্থিতি ধৰা পৰে।

মহিলা গৰাকীৰ উপৰিও ঝাৰখণ্ডৰ মছজিদটোত মুঠ ২৪ গৰাকী লোকে বাহৰ পাতি আছে যাৰ ভিতৰত মুঠ ১৭ গৰাকী বিদেশী নাগৰিক।

মালেছিয়ান মহিলা গৰাকীৰ শৰীৰত ক’ৰ’না ভাইৰাছৰ উপস্থিতি ধৰা পৰাৰ পিছত মছজিদটোত বাহৰ পাতি থকা আটাইকেইগৰাকী লোকক কোৱাৰিণ্টাইন ব্যৱস্থা কৰা হৈছে বুলি ৰাজ্যখনৰ মুখ্য স্বাস্থ্য সচিৱ নিতিন মদন কুলকাৰ্ণিয়ে প্ৰকাশ কৰে।
উল্লেখযোগ্য যে, অসমতো আজি প্ৰথম গৰাকী ক’ৰ’না পজিটিভ ব্যক্তিক চিনাক্ত কৰা হয়। অসমৰ কৰিমগঞ্জৰ ৫২ বছৰীয়া এগৰাকী লোকৰ শৰীৰত এই মহামাৰী ভাইৰাছ বিধৰ উপস্থিতি ধৰা পৰে।

বৰ্তমান শিলচৰ চিকিৎসা মহাবিদ্যালয়ত চিকিৎসা প্ৰদান কৰি থকা হৈছে ক’ৰ’নাত আক্ৰান্ত লোকজনক। ৰাজ্যত প্ৰথমটো ক’ৰ’নাত আক্ৰান্ত হোৱাৰ ঘটনা পোহৰলৈ অহাৰ পাছত এতিয়া এই সংখ্যা আৰু বৃদ্ধি পাব বুলি ধাৰণা কৰা হৈছে।