বঙাইগাঁও, বৰপেটা আৰু মৰিগাঁওৰ পিচত এইবাৰ গোৱালপাৰাত আৰক্ষীৰ জালত মছজিদৰ ইমামৰূপী জেহাদী

বঙাইগাঁও, বৰপেটা আৰু মৰিগাঁওৰ পিচত এইবাৰ গোৱালপাৰাত জেহাদী আৰক্ষীৰ জালত ৷ গোৱালপাৰাৰ মৰনৈ থানাৰ অন্তৰ্গত কোডালধোৱা ডাকাইদলৰ পৰা আব্দুছ চোবাহান আৰু মাটিয়া থানাৰ অন্তৰ্গত গোপালপুৰ টিলাপাৰাৰ পৰা জালালুদ্দুিন শেখক আৰক্ষীয়ে প্ৰথমে সোধাপোছা কৰিবৰ বাবে আটক কৰে আৰু জেৰাৰ অন্তত নিশা দুয়োকে গ্ৰেপ্তাৰ কৰে গোৱালপাৰা আৰক্ষীয়ে ৷

এই সংক্ৰান্তত মাটিয়া থানাত এক গোচৰ ৰুজু কৰি তদন্ত অব্যাহত ৰাখিছে ৷ আৰক্ষীয়ে দুয়োকে গ্ৰেপ্তাৰ কৰাৰ পিছতে পোহৰলৈ আহিছে বহু বিস্ফোৰক তথ্য ৷ তিনি দিন পূৰ্বে পশ্চিম বংগত STF য়ে গ্ৰেপ্তাৰ কৰা আব্দুৰ ৰেকিবৰ স্বীকাৰোক্তিৰ ভিত্তিতে আব্দুছ চোবাহানক কৰায়ত্ত কৰে ৷ গ্ৰেপ্তাৰৰ পিছতে জেহাদীদ্বয়ৰ ঘৰৰ পৰা বহু আপত্তিজনক নথি পত্ৰৰ লগতে জেহাদীৰে সম্পৰ্ক ৰখা মোবাইল ফোন, চিম কাৰ্ড, ATM কাৰ্ড জব্দ কৰাৰ লগতে অন্য এজনৰ তলা বন্ধ ঘৰৰ পৰা এখন বাংলাদেশৰ পতাকাও উদ্ধাৰ কৰিছে ৷

আনহাতে মাটিয়া গোপালপুৰৰ জালালুদ্দিন শেখে ২০১৯ চনতে এক ধৰ্মসভা অনুষ্ঠিত কৰিছিল, য’ত বাংলাদেশৰ বহু কেইজন জেহাদী আমন্ত্ৰিত অতিথি হিচাবে উপস্থিত আছিল ৷ যি কথাই বহু তাৎপৰ্য বহন কৰিছে ৷ আৰক্ষীয়ে তথ্য পোৱা মতে এই দুই জেহাদীয়ে বাংলাদেশৰ পলাতক জেহাদী, লিংক মেন আৰু স্লিপাৰ চেলক আশ্ৰয়ো প্ৰদান কৰিছিল। ইয়াৰে আব্দুছ চোবাহানে ২০১৮ চনতে অল কায়দাত যোগ দিছিল ৷

ধৃত দুয়ো জেহাদীয়ে মছজিদৰ ইমাম ৷ ইফালে মাটিয়া থানাত অসম আৰক্ষীৰ বিশেষ শাখা, IB, সেনাবাহিনীৰ লোকে ধাৰাবাহিক জেৰা অব্যাহত ৰাখিছে ৷ গ্ৰেপ্তাৰ হোৱা দুই জেহাদীৰ AQIS আৰু ABT ৰ লগত প্ৰত্যক্ষভাৱে জৰিত বুলি আৰক্ষীয়ে তথ্য লাভ কৰিছে ৷

লক্ষ্যণীয় কথাটো হ’ল যে, শেহতীয়াকৈ ৰাজ্যত গ্ৰেপ্তাৰ হোৱা জেহাদী সকলোৰ অধিকাংশই মাদ্ৰাছাৰ লগত জৰিত আৰু মছজিদৰ ইমাম। যি সকল লোকক সাধাৰণতে জেহাদী বুলি সন্দেহ কৰা নহয় বা এই সকল এনে একো একো গৰাকী লোক যি সকলৰ কথা সমাজৰ ১০ জন মানুহে শুনে, গতিকে এনেধৰণৰ লোকৰ জৰিয়তে জেহাদীৰ কাৰ্যকলাপ চলাই নিয়াত সহজ হয় ৷