পৱন খেৰাৰ জামিন বিচাৰি উচ্চতম ন্যায়ালয়ৰ দ্বাৰস্থ হ’ব কংগ্ৰেছ
অসমৰ মুখ্যমন্ত্রী হিমন্ত বিশ্ব শৰ্মাৰ পত্নী ৰিণিকি ভূঞা শৰ্মাই তৰা এটা গোচৰত গুৱাহাটী উচ্চ ন্যায়ালয়ে কংগ্ৰেছ নেতা পৱন খেৰাৰ অগ্ৰিম জামিন আবেদন নাকচ কৰিছে। এই ঘটনাৰ পাছতে নিখিল ভাৰত কংগ্ৰেছ কমিটিৰ সাধাৰণ সম্পাদক জয়ৰাম ৰমেশে প্ৰতিক্ৰিয়া প্ৰকাশ কৰি জনাইছে যে তেওঁলোকে ন্যায় বিচাৰি এতিয়া উচ্চতম ন্যায়ালয়ৰ দ্বাৰস্থ হ’ব।
শনিবাৰে সামাজিক মাধ্যম এক্সৰ জৰিয়তে ৰমেশে কয় যে সমগ্ৰ কংগ্ৰেছ দল পৱন খেৰাৰ সৈতে একগোট হৈ থিয় দিছে। তেওঁ আত্মবিশ্বাসেৰে উল্লেখ কৰে যে ভয়-ভাবুকি আৰু হাৰাশাস্তিৰ ৰাজনীতিৰ বিৰুদ্ধে অৱশেষত ন্যায়ৰহে জয় হ’ব।
গুৱাহাটী উচ্চ ন্যায়ালয়ে শুক্ৰবাৰে এই গোচৰটোৰ ৰায়দান কৰি কয় যে পৱন খেৰাৰ বিৰুদ্ধে থকা অভিযোগসমূহ কেৱল মানহানিৰ মাজতে সীমাবদ্ধ হৈ থকা নাই। ভাৰতীয় ন্যায় সংহিতাৰ অধীনত এইটো এটা গুৰুতৰ অপৰাধ বুলি আদালতৰ মজিয়াত স্পষ্ট কৰা হৈছে। ন্যায়াধীশ পাৰ্থিৱজ্যোতি শইকীয়াই জামিন আবেদনখন নাকচ কৰি পর্যবেক্ষণ কৰে যে গোচৰটোৰ তদন্তৰ স্বাৰ্থত খেৰাক জিম্মাত লৈ জেৰা কৰাৰ প্ৰয়োজন আছে। যিবোৰ নথিপত্ৰৰ ওপৰত ভিত্তি কৰি খেৰাই সংবাদমেলত অভিযোগ উত্থাপন কৰিছিল, সেইবোৰ ভুৱা হোৱাৰ সম্ভাৱনা আছে বুলি আদালতে মত প্ৰকাশ কৰিছে।
বিচাৰপীঠে নিজৰ ৰায়দানত উল্লেখ কৰে যে পৱন খেৰাই তেওঁৰ হাতত থকা নথিপত্ৰসমূহৰ সত্যতা এতিয়ালৈকে সন্দেহাতীতভাৱে প্ৰমাণ কৰিব পৰা নাই। লগতে এ এগৰাকী নিৰ্দোষ মহিলাক বিনা কাৰণত বিতৰ্কলৈ টানি অনা হৈছে বুলিও আদালতে গুৰুত্বসহকাৰে লৈছে। ৰিণিকি ভূঞা শৰ্মাৰ ওপৰত লগোৱা বিদেশী নাগৰিকত্ব আৰু বিদেশত থকা কোম্পানীৰ বৃহৎ বিনিয়োগৰ অভিযোগসমূহ তদন্তৰ প্ৰাৰম্ভিক পৰ্যায়ত সত্য বুলি প্ৰমাণিত হোৱা নাই। আদালতৰ মতে, এই নথিপত্ৰবোৰ তেওঁ ক’ৰ পৰা পালে আৰু ইয়াৰ আঁৰত কোন কোন জড়িত আছে, সেই কথা পোহৰলৈ অনাটো জৰুৰী।
যোৱা ৫ এপ্ৰিলত গুৱাহাটীত এখন সংবাদমেল আয়োজন কৰি পৱন খেৰাই ৰিণিকি ভূঞা শৰ্মাৰ বিৰুদ্ধে গুৰুতৰ অভিযোগ উত্থাপন কৰিছিল। ইয়াৰ পাছতে শৰ্মাই খেৰাৰ বিৰুদ্ধে এজাহাৰ দাখিল কৰিছিল আৰু সকলো অভিযোগ ভিত্তিহীন বুলি অস্বীকাৰ কৰিছিল। বৰ্তমান উচ্চ ন্যায়ালয়ৰ পৰা কোনো সকাহ নোপোৱাৰ পাছত কংগ্ৰেছ দলে আশা কৰিছে যে দেশৰ সৰ্বোচ্চ ন্যায়ালয়েহে এই বিষয়ত তেওঁলোকক ন্যায় প্ৰদান কৰিব। দলটোৰ মতে, পলিটিকেল টাৰ্গেটৰ নামত তেওঁলোকৰ নেতাজনক লক্ষ্য কৰি লোৱা হৈছে।