সপ্তম সংযোজন হিচাপে কলিয়াবৰৰ বান্দৰডুবি অঞ্চল কাজিৰঙা ৰাষ্ট্ৰীয় উদ্যানক হস্তান্তৰ

ছটাকৈ সংযোজনৰ পাচত বিশ্ব ঐতিহ্য ক্ষেত্র কাজিৰঙা ৰাষ্ট্ৰীয় উদ্যানৰ সৈতে আনুষ্ঠানিকভাৱে সংযোজিত সপ্তম সংযোজনৰ ৩১৩ হেক্টৰ ভূমি।

ৰাষ্ট্ৰীয় উদ্যানৰ দক্ষিনে নগাঁও জিলাৰ কলিয়াবৰ মহকুমাৰ বাগৰি বনাঞ্চলৰ বান্দৰডুবি এলেকাৰ ৩১৩ হেক্টৰ ভূমি আনুষ্ঠানিকভাৱে কাজিৰঙা ৰাষ্ট্ৰীয় উদ্যান কৰ্তৃপক্ষৰ হাতত অৰ্পণ কৰা হয়।

চাৰি বছৰৰ পূর্বে গুৱাহাটী উচ্চ ন্যায়ালয়ে এক নির্দেশ যোগে কাজিৰঙাৰ দক্ষিণ সীমাত থকা বান্দৰডুবিৰ ২৯৭ হেক্টৰ আৰু দেওচূৰৰ ১৬ হেক্টৰ ভূমিত উচ্ছেদ চলাইছিল য’ত আৰক্ষী গুলীত দুজন লোকেৰ মৃত্যু হৈছিল।

উক্ত উচ্ছেদ অভিযানৰ চাৰি বছৰ পাচত এই বেদখলমুক্ত কৰা ভূমি ৰাজহ বিভাগে কাজিৰঙা ৰাষ্ট্ৰীয় উদ্যান কর্তৃপক্ষক বৃহস্পতিবাৰে আনুষ্ঠানিক ভাৱে হস্তান্তৰ কৰে।

বিগত চাৰিটা বছৰত এই উচ্ছেদিত ভূমিত কিছু লোকে খেতি কৰি পুনৰ বেদখল কৰাৰ চেষ্টা চলাইছিল। যদিও কাজিৰঙাৰ সঞ্চালক পি শিৱকুমাৰে ইয়াক জে চি বি লগাই পুনৰ উচ্ছেদ কৰি সীমা চিহ্নিত কৰাৰ লগতে বনকৰ্মীয়ে তহল দিব পৰাকৈ সীমান্ত পথো নিৰ্মাণ কৰে।

সঞ্চালক গৰাকীৰ এনে কাৰ্যৰ বাবেই কাজিৰঙা ৰাষ্ট্ৰীয় উদ্যানৰ সৈতে সপ্তম সংযোজন হিচাবে বান্দৰডুবি আৰু দেওচূৰ অঞ্চলৰ ভূমি সংযোজিত হয়।

কলিয়াবৰৰ মহকুমাধিপতি কার্যালয়ত আয়োজিত বৈঠকত প্ৰধান মুখ্য বন সংৰক্ষক এম কে যাদৱ, কাজিৰঙাৰ সঞ্চালক পি শিবকুমাৰ, কলিয়াবৰৰ মহকুমাধিপতি বিতোপন নেওঁগৰ উপস্থিতিত কাজিৰঙাৰ ডি এফ অ’ ৰমেশ গগৈৰ হাতত কলিয়াবৰৰ ৰাজহ চক্র বিষয়াই বান্দৰডুবি আৰু দেওচুৰৰ ভূমি সপ্তম সংযোজন হিচাপে আনুষ্ঠানিকভাৱে অৰ্পণ কৰে।

পি শিৱকুমাৰৰ মতে বান্দৰডুবিৰ এই সপ্তম সংযোজন এলেকা ইতিমধ্যেই গঁড়, হাতী, পহু, ম’হ আদি বন্যপ্রাণীৰ আৱাস হৈ পৰিছে।

কাজিৰঙা ৰাষ্ট্ৰীয় উদ্যানৰ বন্যপ্রাণীৰ আশ্ৰয়ৰ বাবে চলিত বৰ্ষত এই এলেকাত নতুনকৈ দুটা হাইলেণ্ড নির্মাণ কৰা হ’ব বুলিও তেওঁ জনায়।

বান্দৰ ডুবি অঞ্চলত হোৱা বন্যপ্ৰাণী আগমনৰ বাবে অঞ্চলটোক পর্যটক বাবে মুকলি কৰাৰ পৰিকল্পনা কৰিছে উদ্যান কৰ্তৃপক্ষই। ইয়াৰ বাবে অঞ্চলটোৰ আন্তঃগাঠনি নিৰ্মাণৰ কামো আৰম্ভ কৰিছে। সকলো ঠিকে থাকিলে আগন্তুক পৰ্যটন বৰ্ষত কাজিৰঙাৰ পৰ্যটন মানচিত্ৰত বান্দৰডুবি অন্তৰ্ভূক্ত হ’ব।