অসম আৰু অসমীয়াৰ হকে কাম কৰাৰ উদ্দেশ্যে কংগ্ৰেছ এৰিলে কমল কুমাৰ মেধিয়ে
অসম প্ৰদেশ কংগ্ৰেছৰ মুখপাত্ৰৰ লগতে আৰটিআই বিভাগৰ অধ্যক্ষ কমল কুমাৰ মেধিয়ে আজি আনুষ্ঠানিকভাৱে কংগ্ৰেছ দলৰ পৰা পদত্যাগ কৰে।
পদত্যাগ সন্দৰ্ভত মেধিয়ে আজি দুপৰীয়া প্ৰদেশ কংগ্ৰেছৰ সভাপতি ৰিপুণ বৰালৈ এক পত্ৰ প্ৰেৰণ কৰা বুলি এক ভিডিঅ’যোগে জনায়।
ভিডিঅ’টোত মেধিয়ে বিভিন্ন কথা উল্লেখ কৰি কয়, ‘বিভিন্ন ৰাজনৈতিক কাৰণৰ বাবে মই দলৰ পৰা পদত্যাগ কৰিলো। মই ইতিমধ্যে দলৰ সকলো বিষয়বাব আৰু প্ৰাথমিক সদস্যপদৰ পৰা পদত্যাগ কৰা বুলি সভাপতি ৰিপুণ বৰালৈ পত্ৰ প্ৰেৰণ কৰিছো’।
২০১৮ চনৰ জুন মাহত কংগ্ৰেছ দলত যোগ দিয়া কমল কুমাৰ মেধিয়ে বিগত দিন সমূহত দলে যি দায়িত্ব প্ৰদান কৰিছিল তেওঁ অতি নিষ্ঠাসহকাৰে পালন কৰি যোৱা বুলিও উল্লেখ কৰে।
তেওঁ লগতে ভৱিষ্যত দিন সমূহত অসম আৰু অসমীয়াৰ হকে আৰু দৃঢ়তা তথা আপোচবিহীনভাৱে কাম কৰি যাব বুলিও কয়।
ইয়াৰ উপৰি কমল কুমাৰ মেধিৰ পৰৱৰ্তী পদক্ষেপ কি হ’ব সেই সন্দৰ্ভত তেওঁ কিছুদিনৰ ভিতৰত সংবাদ মাধ্যমৰ জৰিয়তে জনাব বুলি উল্লেখ কৰে।
উল্লেখ্য যে নাগৰিকত্ব সংশোধনী আইনৰ বিৰুদ্ধে প্ৰতিবাদ সাব্যস্ত কৰি বৰ্তমানো কাৰাবাস খাটি থকা কৃষক নেতা অখিল গগৈৰ একালৰ সতীৰ্থ কমল কুমাৰ মেধিয়ে কৃষক মুক্তিৰ তত্বাৱধানত গঠিত ৰাইজৰ দলত যোগদান কৰিব বুলি চৰ্চা লাভ কৰিছে।