বলীউদত উষ্ণতা বৃদ্ধি: এইবাৰ উৰ্মিলাক ‘ছফট পৰ্ণষ্টাৰ’ বুলি কটাক্ষ কংগনা ৰানাৱটৰ
অভিনেত্ৰী কংগনা ৰানাৱটক কেন্দ্ৰ কৰি বিতৰ্কৰ ওৰ পৰা নাই। বলীউদত ড্রাগছ কাণ্ড সন্দৰ্ভত কৰা মন্তব্যৰ বাবে শেহতীয়াকৈ জয়া বচ্চনৰ ক্ষোভৰ সন্মুখীন হৈছিল অভিনেত্ৰীগৰাকী।
ইয়াৰ পাছতে কংগনাই সম্প্ৰতি বাকযুদ্ধত লিপ্ত হৈ পৰিছে বলীউদৰ আন এগৰাকী অভিনেত্ৰী উৰ্মিলা মাতণ্ডকাৰৰ সৈতে।
বুধবাৰে উৰ্মিলাই কংগনাৰ গৃহ ৰাজ্য ‘হিমাচল প্ৰদেশেই ড্ৰাগছৰ ঘাটি’ বুলি কটাক্ষ কৰিছিল।
ৰাষ্ট্ৰীয় সংবাদ মাধ্যমক দিয়া এক সাক্ষাৎকাৰত কংগনাই তেওঁৰ নিজৰ পক্ষে এই অভিযান জাৰি ৰখাৰ কথা সদৰী কৰে।
মুম্বাইত শিৱসেনাই কংগনাৰ সৈতে কৰা আচৰণে তেওঁৰ সন্মান তথা আত্মমৰ্যাদাক মুকলিকৈ হত্যা কৰা বুলি অভিযোগ তোলে।
সেইদৰে, উৰ্মিলাৰ মন্তৱ্যক লৈয়ো প্ৰতিক্ৰিয়া প্ৰকাশ কৰে কংগনা ৰানাৱটে।
কংগনাই কয়,’’মোৰ যুঁজখনক লৈ ঠাট্টা কৰাৰ চেষ্টা কৰিছে উৰ্মিলাই।‘’
কংগনাই উৰ্মিলাক ব্যক্তিগত আক্ৰমণৰ লক্ষ্য কৰি লয়। কংগনাই উৰ্মিলাক ‘ছফট পৰ্ণষ্টাৰ’ বুলিও কটাক্ষ কৰে।
কংগনাই লগতে কয় যে উৰ্মিলাক কোনোৱে তেওঁৰ অভিনয় দক্ষতাৰ বাবে চিনি নাপায়।
ইণ্ডিয়া টুডেক দিয়া সাক্ষাৎকাৰত উৰ্মিলাই কৈছিল যে গোটেই দেশ ড্ৰাগছৰ সমস্যাত ভূগিছে। কংগনাই জানেনে হিমাচল ড্ৰাগছৰ ঘাটি? তেওঁ নিজৰ ৰাজ্যখনৰ পৰাই অভিযান আৰম্ভ কৰা উচিত।
আনহাতে, টাইমছ নাওত দিয়া সাক্ষাৎকাৰত কংগনাই ওলোটাই ইয়াৰ প্ৰত্যুত্তৰ দিয়ে। তেওঁ কয় যে উৰ্মিলাৰ দৰে তেওঁৰ বাবেও এটা নিৰ্বাচনী টিকট যোগাৰ কৰা বৰ বেছি টান কাম নহয়।
কংগনাই প্ৰশ্ন কৰে, ‘কিন্তু মই কি নিজৰ জীৱন দি ইয়াৰ মূল্য ভৰিব লাগিব নেকি? মোৰ ঘৰ পৰ্যন্ত ভাঙি দিয়া হৈছে।‘