কৰ’নাৰে যুঁজত জয়ী হৈ ঘৰলৈ উভতিল কণিকা কাপুৰ; থাকিব লাগিব ১৪ দিনৰ কোৱাৰেন্টাইনত

কৰ’না ভাইৰাছত আক্ৰান্ত হোৱাৰ পাছত যোৱা ২০ মাৰ্চত লক্ষ্ণৌৰ সঞ্জয় গান্ধী প’ষ্ট গ্ৰেজুৱেশ্যন ইনষ্টিটিউট অফ মেডিকেল ছায়েন্স হাস্পাতলত ভৰ্তি হোৱা গায়িকা কণিকা কাপুৰ সম্পূৰ্ণ সুস্থ হৈ উঠিছে।

কণিকাৰ একেৰাহে দুবাৰকৈ কৰা পৰীক্ষাত নিগেটিভ পোৱাৰ পাছত সোমবাৰে তেওঁক হাস্পাতলৰ পৰা যাবলৈ দিয়া হয়।

অৱশ্যে, ঘৰলৈ উভতাৰ পাছত গায়িকাগৰাকীক সতৰ্কতা বজাই ৰাখিবলৈ কোৱা হৈছে। চিকিৎসকৰ পৰামৰ্শ অনুসৰি, কণিকা কাপুৰে ঘৰত ১৪দিন পৰ্যন্ত কোৱাৰেন্টাইনত থাকিব লাগিব।

উল্লেখযোগ্য যে কণিকা কাপুৰৰ একেৰাহে কেইবাটাও পৰীক্ষাত কৰ’না পজিটিভ পোৱা গৈছিল।

বৰ্তমান চিকিৎসকে জানিবলৈ দিয়া মতে কণিকা সম্পূৰ্ণ সুস্থ হৈ উঠিছে। তেওঁৰ শৰীৰত কৰ’নাৰ কোনো লক্ষণ নাই। পঞ্চমটো পৰীক্ষাৰ পাছত এতিয়া ষষ্ঠ নম্বৰ পৰীক্ষাতো ৰিপ’ৰ্ট নিগেটিভ অহাৰ পাছত তেওঁক যাবলৈ দিয়া হৈছে।

কেইবাদিনো ধৰি হাস্পাতলত আইছ’লেশ্যনত থকাৰ পাছত পৰিয়াল তথা সন্তানৰ সৈতে বিচ্ছিন্ন হৈ থকা কণিকা ঘৰলৈ উভতি অহাৰ বাবে গোটেই পৰিয়ালটোৱে স্বস্তিৰ নিশ্বাস পেলাইছে।

উল্লেখযোগ্য যে কণিকা কাপুৰৰ শৰীৰত কৰ’না পজিটিভ পোৱাৰ খৱৰ পোহৰলৈ অহাৰ পাছতে চাঞ্চল্যৰ সৃষ্টি হৈছিল।

কণিকাৰ বিৰুদ্ধে অভিযোগ উঠিছিল যে তেওঁ বিদেশৰ পৰা উভতি অহাৰ পাছত মুম্বাই বিমানবন্দৰত পৰীক্ষা নকৰাকৈ তাৰ পৰা পলাই আহিছিল।

গায়িকাগৰাকীক হাস্পাতলত ভৰ্তি কৰোৱাৰ পাছত কণিকাই চিকিৎসকে তেওঁক ধমক দিয়াৰ কথা প্ৰকাশ কৰিছিল। আনহাতে, চিকিৎসকে জানিবলৈ দিছিল যে কণিকাই চিকিৎসাত সহযোগ কৰা নাছিল।