আফ্রিকান চোৱাইন ফিভাৰৰ সংক্ৰমণৰ পৰা সুৰক্ষিত কাজিৰঙা ৰাষ্ট্ৰীয় উদ্যান

ৰাজ্যৰ বিভিন্ন প্ৰান্তত আফ্রিকান চোৱাইন ফিভাৰৰ ফলত বহু গাহৰিৰ মৃত্যু হৈছে যদিও এতিয়ালৈকে কাজিৰঙা ৰাষ্ট্ৰীয় উদ্যান এই ৰোগৰ পৰা সুৰক্ষিত হৈ আছে।

ৰাষ্ট্ৰীয় উদ্যান তথা ইয়াৰ কাষৰীয় অঞ্চলত এই পৰ্যন্ত গাহৰিৰ মৃত্যু হোৱাৰ তথ্য পোৱা নাই। অঞ্চলটোৰ বনৰীয়া বা পোহনীয়া কোনো গাহৰিয়ে যাতে ইয়াৰ সংস্পৰ্শলৈ নাহে তাৰ বাবে বিশেষ ব্যৱস্থা হাতত লৈছে উদ্যান কৰ্তৃপক্ষই।

আজি কাজিৰঙাৰ ডি এফ অ’ ৰমেশ কুমাৰ গগৈৰ নিৰ্দেশত বনাঞ্চলিক বিষয়া বিদ্যুত বিকাশ বৰাই দ্ৰোনৰ জৰিয়তে কাজিৰঙাৰ পূব বনাঞ্চলত বনৰীয়া গাহৰি আৰু পোহনীয়া গাহৰিৰ বিচৰণ নিৰীক্ষণ কৰে।

উল্লেখযোগ্য যে অগৰাতলি বনাঞ্চলৰ গুৰুত্বপূৰ্ণ আৰ্দ্ৰভূমি চহলা বিলৰ গাতে লাগি আছে উদ্যানখনৰ পূব সীমা। এই সীমাত লাগি থকা গাঁওবোৰত বহুতো পোহনীয়া গাহৰি আছে।

বনাঞ্চলিক বিষয়া গৰাকীৰ মতে আফ্ৰিকান চোৱাইন ফিভাৰৰ সম্পৰ্কত তেওঁলোকে কাষৰীয় গাঁওবোৰত সজাগতা সৃষ্টি কৰি পোহনীয়া গাহৰিবোৰ বান্ধি ৰাখিবলৈ গাঁওবাসীক আহ্বান জনাই আহিছে।

এইক্ষেত্ৰত গাওঁবাসীৰ পৰা তেওঁলোকে ইতিবাচক সহাঁৰি পোৱা বুলি তেওঁ লগতে জানিবলৈ দিয়ে।

ইফালে উজনিৰ পৰা ব্ৰহ্মপুত্ৰ আৰু ধনশিৰিত উটি অহা গাহৰিৰ মৃতদেহ যাতে কাজিৰঙালৈ নাহে তাৰ ওপৰত তীক্ষ্ণ দৃষ্টি ৰাখিবলৈ বিভিন্ন বনশিবিৰৰ বনকৰ্মীসকলক নিৰ্দেশ দিয়া হৈছে।

ইয়াৰ উপৰি কাজিৰঙা বন সংমণ্ডল প্ৰধিকাৰী ৰমেশ কুমাৰ গগৈৰ নিৰ্দেশত কাজিৰঙা ৰাষ্ট্ৰীয় উদ্যানৰ বনৰীয়া গাহৰি সমূহৰ ওপৰতো নজৰ ৰাখিছে বনকৰ্মী সকলে।

কাজিৰঙাৰ উত্তৰ দিশে থকা ষষ্ঠ সংযোজন এলেকাৰ বিশ্বনাথ বন সংমণ্ডল এলেকাত ব্ৰহ্মপুত্ৰত উটি অহা ৩১ টা মৃত গাহৰি উদ্ধাৰ কৰি বিধিগত ভাৱে পুতি পেলোৱা হয়।