কেৰালা চৰকাৰৰ আশাপ্ৰদ কাৰ্যসূচী: মুকলি হ’ল ‘গল প্ৰজেক্ট’, পাঁচ লাখ শিক্ষাৰ্থীক দিয়া হ’ব ফুটবলৰ মৌলিক প্ৰশিক্ষণ

ভাৰতীয় ফুটবল বুলিলে দক্ষিণাত্যৰ প্ৰদেশ কেৰালাৰ অৱদানৰ কথা সদায়ে সমুখলৈ আহিব। ভাৰতীয় ফুটবলত পূৰ্বৰে পৰা ৰাজ্যখনৰ পৰা ওলাই অহা তাৰকা খেলুৱৈয়ে বিশেষ স্থান দখল কৰি আহিছে। দেশত ফুটবলৰ মানদণ্ড আৰু চৰকাৰ তথা কৰ্তৃপক্ষৰ অৱহেলাক লৈ সময়ে সময়ে উত্থাপিত হোৱা প্ৰশ্নৰ মাজতে ভাৰতীয় ফুটবলৰ অন্যতম প্ৰাণকেন্দ্ৰ কেৰালাত ৰাজ্য চৰকাৰে গ্ৰহণ কৰিছে এক প্ৰশংসনীয় পদক্ষেপ।

ৰাজ্যখনৰ নতুন প্ৰজন্মক ফুটবলৰ মৌলিক প্ৰশিক্ষণ প্ৰদানৰ বাবে কেৰালা চৰকাৰে মুকলি কৰিছে ‘গল প্ৰজেক্ট’ শীৰ্ষক এক বিশেষ কাৰ্যসূচী। কেৰালাৰ বাঁওপন্থী চৰকাৰৰ ক্ৰীড়া মন্ত্ৰী ভি আব্দুৰহিমানে শুকুৰবাৰে ‘গল প্ৰজেক্ট’ উদ্বোধন কৰে। এই কাৰ্যসূচীৰ অধীনত ৰাজ্যজুৰি পাঁচ লাখ শিক্ষাৰ্থীক ফুটবলৰ মৌলিক প্ৰশিক্ষণ প্ৰদান কৰা হ’ব বুলি চৰকাৰে জানিবলৈ দিছে।

কেৰালাৰ ৰাজ্যিক ক্ৰীড়া আৰু যুৱ পৰিক্ৰমা সঞ্চালকালয় আৰু ক্ৰীড়া পৰিষদৰ দ্বাৰা যুটীয়াভাৱে পৰিচালিত এক বিশেষ কাৰ্যসূচী এই ‘গল প্ৰজেক্ট’ জিলাখনৰ কাদাইৰিপ্পু উচ্চতৰ মাধ্যমিক বিদ্যালয়ত শুকুৰবাৰে আনুষ্ঠানিকভাৱে মুকলি কৰা হয়।

ৰাজ্যখনৰ ক্ৰীড়া সঞ্চালকালয়ে এক বিজ্ঞপ্তিত উল্লেখ কৰা মতে এই ‘গল প্ৰজেক্ট’ৰ অধীনত প্ৰথম পৰ্যায়ত ১,০০০ টা কেন্দ্ৰত ১০ দিনৰ বাবে এক লাখ শিক্ষাৰ্থীক প্ৰশিক্ষণ দিয়া হ’ব। এই প্ৰজেক্টৰ অংশ হিচাপে মৌলিক প্ৰশিক্ষণত উৎকৃষ্ট প্ৰদৰ্শন আগবঢ়োৱা ১০০ গৰাকী শিক্ষাৰ্থীক বিদেশী প্ৰশিক্ষকৰ দ্বাৰা আন্তঃৰাষ্ট্ৰীয় পৰ্যায়ৰ প্ৰশিক্ষণ প্ৰদান কৰা হ’ব বুলি ক্ৰীড়ামন্ত্ৰী ভি আব্দুৰহিমানে জানিবলৈ দিছে।

‘গল প্ৰজেক্ট’ৰ উদ্বোধনী অনুষ্ঠানৰ সময়ত ভাৰতৰ আগশাৰীৰ ফুটবল লীগ ‘ইণ্ডিয়ান চুপাৰ লীগ’ৰ ফ্ৰেন্সাইজি কেৰালা ব্লাষ্টাৰ্ছৰ খেলুৱৈ মহম্মদ চাহাল উপস্থিত থাকে। ৰাজ্যখনত ফুটবলৰ বিকাশৰ বাবে এই কাৰ্যসূচী অত্যাৱশ্যকীয় আছিল বুলি চাহালে কয়।

অনুষ্ঠানটোৰ সময়ত ক্ৰীড়ামন্ত্ৰী ভি আব্দুৰহিমানে প্ৰখ্যাত ফুটবল প্ৰশিক্ষক ৰুফাছ ডিচুজাক সম্বৰ্ধনা জনায়। সম্প্ৰতি ৯০ বৰ্ষীয় ৰুফাছ ডিচুজাই এতিয়াও যুৱ খেলুৱৈসকল উপকৃত হোৱাকৈ ফুটবলৰ প্ৰশিক্ষণ প্ৰদান কৰি আহিছে।