বলপূৰ্বক ওঁঠত চুম্বন! কামাল হাছানৰ বিৰুদ্ধে যৌন নিৰ্যাতনৰ অভিযোগ মোহময়ী অভিনেত্ৰীৰ
বলীউদৰ পাছত এইবাৰ দক্ষিণৰ ছবি জগতক #MeTooবিতৰ্কৰ ধুমুহাই জোকাৰিছে। যৌন নিৰ্যাতনৰ অভিযোগ এইবাৰ দক্ষিণৰ ছবি জগতৰ ছুপাৰষ্টাৰ তথা ৰাজনীতিক কামাল হাছানৰ বিৰুদ্ধে।
চলচ্চিত্ৰ এখনৰ শ্বুটিঙৰ সময়ত হঠাতে কামাল হাছানে ওঁঠত চুম্বন কৰাৰ অভিযোগ তুলিছে দক্ষিণৰ বৰ্ষীয়ান অভিনেত্ৰী ৰেখাই।
অৱশ্যে, এই ঘটনা এতিয়াৰ নহয়। এয়া বহুদিন আগৰ ঘটনাহে। “পুন্নাগাই মান্নান’ নামৰ ছবিখনত একেলগে কামাল হাছান আৰু ৰেখাই অভিনয় কৰাৰ সময়ৰ ঘটনা এয়া।
ছবিখনৰ শ্বুটিং চলি থকা সময়ত হঠাতে ৰেখাৰ ওঁঠত চুমা আঁকি দিয়ে কামাল হাছানে।
ৰেখাই কয়,“কিছু জোৰ কৰিয়েই সেয়া ঘটিছিল। আৰু সেইটো মোৰ সন্মতিৰ বিৰুদ্ধেই।‘
দৃশ্যটোৰ শ্বুটিং হৈ যোৱাৰ পাছত ৰেখাক কোৱা হৈছিল যে সেয়া কেবল কাহিনী আৰু চৰিত্ৰৰ দাবী অনুসৰিহে কৰা হৈছিল।
কিন্তু সেইটোৱে যদি হয় তেনেহ’লে সেই দৃশ্যত চুম্বনৰ উল্লেখ চিত্ৰনাট্যত থাকিলহেঁতেন নাইবা অভিনেত্ৰীক আগতে সেই কথা কিয় জনোৱা নহ’ল। অভিনেত্ৰী ৰেখাই তুলিছে এই প্ৰশ্ন।
ছবিখনৰ পৰিচালক বালাচন্দ্ৰ আৰু কামাল হাছানেই কেবল সেই দৃশ্যৰ বিষয়ে জানিছিল। সেয়েহে কেমেৰা ৰোল হোৱাৰ পাছতেই কামাল হাছানে যেতিয়া ৰেখাক ঘনিষ্ঠভাৱে চুম্বন কৰে স্বাভাৱিকতেই অবাক হৈ পৰে ৰেখা।
আনহাতে, পৰিচালক বালাচন্দ্ৰৰ অনুমতি অবিহনে কামাল হাছানে কিদৰে চুম্বন কৰিব পাৰে তাক লৈয়ো প্ৰশ্ন উত্থাপন কৰিছে ৰেখাই। ৰেখাৰ সমৰ্থনত থিয় দিছে দক্ষিণৰ প্ৰসিদ্ধ অভিনেত্ৰী চিন্ময়ী শ্ৰীপদে।
শেহতীয়াকৈ টেলিভিশ্বনৰ এক সাক্ষাৎকাৰত চলচ্চিত্ৰখনৰ সেই শ্বুটিঙৰ ঘটনাৰ কথা সদৰী কৰিছে ৰেখাই।
ইয়াৰ পাছতেই দক্ষিণৰ ছবি উদ্যোগৰ এক বৃহৎ অংশই ৰেখাৰ সমৰ্থনত আগবাঢ়ি আহিছে।
কোৱা হৈছে যে ঘটনাটো যিসময়ৰ সেই সময়ত কামাল হাছান দক্ষিণৰ ছবি জগতত অত্যন্ত প্ৰভাৱশালী অভিনেতা আছিল। সেয়েহে সম্ভৱত: তেওঁৰ বিৰুদ্ধে কোনেও মুখ খোলাৰ সাহস কৰা নাছিল।
ৰেখাই লগতে কয় যে “পুন্নাগাই মান্নান’ ছবিখনৰ শ্বুটিঙৰ সময়ত তেওঁৰ বয়স আছিল মাত্ৰ ১৬ বছৰ। তদুপৰি, ছবিজগতত তেওঁ নৱাগত। সেয়েহে চাগে তেওঁৰ পৰা কোনোৱে অনুমতি লোৱাৰ প্ৰয়োজন বোধ নকৰিলে।
ছবিখনৰ সেই দৃশ্যৰ শ্বুটিং হৈ যোৱাৰ পাছত লাজত জয় পৰি যায় ৰেখা। পৰ্দাত কন্যাৰ চুম্বন দেখি পিতৃয়ে কি ভাবিব সেয়া ভাবিয়েই তেওঁ মানসিকভাৱে ভাগি পৰিছিল।
যি নহওক ৰেখাই এই ঘটনাৰ কথা সদৰী কৰাৰ পাছতেই ছবিজগতত প্ৰৱল আলোড়নৰ সৃষ্টি হৈছে।