কাজিৰঙা আৰু দাঁতিকাষৰীয়া অঞ্চলত বন্যপ্ৰাণী, পশুধনক প্ৰতিষেধক প্ৰদান অভিযান

ল’কডাউনৰ মাজতেই ৰাজ্যৰ বিভিন্ন স্থানত গাহৰিৰ অস্বাভাৱিক হাৰত মৃত্যু হোৱা ঘটনাই কাজিৰঙা ৰাষ্ট্ৰীয় উদ্যান কৰ্তৃপক্ষক চিন্তিত কৰি তুলিছে।

এই ঘটনাই কাজিৰঙা ৰাষ্ট্ৰীয় উদ্যানৰ বন্য প্ৰাণীবোৰৰ ক্ষেত্ৰত যাতে কোনো সমস্যাৰ সৃষ্টি কৰিব নোৱাৰে তাৰ বাবে আজিৰ পৰা কাজিৰঙা ৰাষ্ট্ৰীয় উদ্যানৰ কাষৰীয় গাঁও আৰু ব্ৰহ্মপুত্ৰৰ চাপৰিবোৰত থকা গৰু ম’হক প্ৰতিষেধক দিয়াৰ অভিযান আৰম্ভ কৰিছে ৰাষ্ট্ৰীয় উদ্যান কৰ্তৃপক্ষই।

বোকাখাতৰ মহকুমা পশু চিকিৎসা বিভাগৰ সহযোগত আৰম্ভ কৰা এই অভিযানৰ প্ৰথম দিনা ধোৱাআটি গাঁৱৰ ৩৫৪টা গ’ৰুক প্ৰতিষেধক প্ৰদান কৰা হয়। গৰু ম’হক প্ৰদান কৰা ট্ৰায়’ভেক নামৰ এই প্ৰতিষেধকে গাঁওবোৰৰ পশুধনক গলফুলা, জহৰবাক আৰু চবকাৰ দৰে ৰোগৰ পৰা প্ৰতিৰোধ কৰিব বুলি পশু চিকিৎসকে জনাইছে।

পৰৱৰ্তী সময়ত অহা ২ মে’ত ভক্তে চাপৰি আৰু গাভৰুকে ধৰি ছটা চাপৰিত প্ৰতিষেধক প্ৰদান কৰি কাজিৰঙাৰ কাষৰীয় গাঁওবোৰতো এই প্ৰতিষেধক দিয়া হ’ব বুলি বন বিভাগৰ সুত্ৰত প্ৰকাশ। এই অভিযানৰ অধীনত উদ্যানখনৰ কেউটা বনাঞ্চলৰ কাষৰীয় জনসাধাৰণৰ পশুধনক প্ৰতিষেধক প্ৰদান কৰা হ’ব।

প্ৰতিষেধক প্ৰদান কৰা দহজনীয়া দলটোৰ নেতৃত্ব দিয়ে বোকাখাতৰ পশু চিকিৎসা কেন্দ্ৰৰ পশু চিকিৎসক ডা০ জানমনি শ্যাম আৰু ডা০ চৈয়দ মেহতাজে।

প্ৰতি বছৰতে কৰি অহা এই অভিযানত কাজিৰঙা ৰাষ্ট্ৰীয় উদ্যান কৰ্তৃপক্ষক বিশ্ব প্ৰকৃতি নিধি, আৰণ্যক, কৰবেট ফাউণ্ডেচন, ভুমি আৰু ৱাইল্ড লাইফ ট্ৰাষ্ট অৱ ইণ্ডিয়াই সহযোগিতা আগবঢ়াই আহিছে।