সীমাহীন দুৰ্নীতি আৰু অনিয়মৰ অভিযোগ; গাওঁ পঞ্চায়তৰ কাৰ্যালয়ত তলা লগালে ভুক্তভোগী ৰাইজে

গোলাঘাট পশ্চিম উন্নয়ন খণ্ড বোকাখাতৰ দক্ষিণ কাজিৰঙা গাওঁ পঞ্চায়তৰ কাৰ্যালয়ত শনিবাৰৰ পুৱাতে স্থানীয় ৰাইজে তলা বন্ধ কৰে ৷ গাওঁ পঞ্চায়ত খনত হোৱা সীমাহীন দুৰ্নীতি আৰু উন্নয়নৰ নামত একো নকৰাৰ প্ৰতিবাদতেই পুৰুষ-মহিলাৰ এটা দলে শনিবাৰৰ পুৱা পঞ্চায়ত কাৰ্যালয় ঘেৰাও কৰি শিকলিৰে তলা ওলমাই বন্ধ কৰি দিয়ে ৷

ৰাইজৰ অভিযোগ মতে দক্ষিণ কাজিৰঙা গাওঁ পঞ্চায়তত দূৰ্নীতি আৰু অনিয়ম হোৱাৰ উপৰিও গাওঁৰ বোকাময় পথ মেৰামতি আৰু বিদ্যুতিক ট্ৰন্সফৰ্মাৰ সক্ৰিয় কৰাৰ বাবে গাওঁবাসীয়ে কৰা দাবী আজিও পুৰণ নকৰিলে পঞ্চায়ত খনে।

লগতে পঢ়ক: লোক-সংস্কৃতিৰ গৱেষক, গুৱাহাটী বিশ্ববিদ্যালয়ৰ অৱসৰপ্ৰাপ্ত অধ্যাপক ডঃ প্ৰবীণ চন্দ্ৰ দাসৰ পৰলোকপ্ৰাপ্তি

দক্ষিণ কাজিৰঙা গাওঁ পঞ্চায়তৰ সভানেত্ৰীৰ হৈ তেওঁৰ স্বামীয়ে পঞ্চায়তৰ বহু দুৰ্নীতিত জড়িত থকাৰ অভিযোগো তুলিছে স্থানীয় ৰাইজে।

ইফালে পঞ্চায়তখনৰ অধীনত নিৰ্মাণৰত প্ৰধানমন্ত্ৰী আৱাস যোজনাৰ গৃহ নিৰ্মাণৰ দ্বিতীয় কিস্তিৰ বাবে হিতাধিকাৰীৰ নিৰ্মাণৰত ঘৰৰ ফটো তোলাৰ বাবে ৱাৰ্ড সদস্যই ধনৰ দাবী কৰাৰো অভিযোগ উত্থাপন কৰিছে হিতাধিকাৰীয়ে ৷

জনৈক পুস্প দলে নামৰ লোকজনে ৱাৰ্ড সদস্যৰ হৈ ঘৰৰ ফটো তোলাৰ নামত দুহেজাৰ টকাকৈ ধন দাবী কৰা বুলিও হিতাধিকাৰীয়ে জনাইছে ৷ যাৰ বাবে প্ৰথম কিস্তিৰ কাম শেষ হোৱাৰ পিচতো বহু হিতাধিকাৰীয়ে দ্বিতীয় কিস্তিৰ ধন লাভ কৰা নাই আৰু আধৰুৱা হৈ থকা ঘৰৰ বাবে জীয়াতু ভূগিব লগা হৈছে বুলি অভিযোগ কৰিছে ৷

লগতে পঢ়ক: শ্বাবানা আজমী, জাভেদ আখটাৰ, নাছিৰুদ্দিন শ্বাহ টুকড়ে টুকড়ে দলৰ শ্লিপাৰ চেল! মধ্যপ্ৰদেশৰ গৃহমন্ত্ৰী

এনে বহু পঞ্জীভুত ক্ষোভৰ পৰিপ্ৰেক্ষিততেই স্থানীয় পুৰুষ-মহিলা সদলবলে আহি দক্ষিণ কাজিৰঙা গাওঁ পঞ্চায়তৰ কাৰ্যালয়ত তলা ওলমাই দিয়ে ৷