গেলামালৰ দোকান, ফাৰ্মাচিৰ বাহিৰে অসমত সকলো বজাৰ বন্ধৰ নিৰ্দেশ
লকডাউনৰ মাজত অসমত গেলামালৰ দোকান আৰু ফাৰ্মাচিৰ বাহিৰে সকলো বজাৰ বন্ধ ৰখাৰ বাবে অসমৰ মুখ্য সচিবে শুকুৰবাৰে নিৰ্দেশ দিছে।
এই নিৰ্দেশ তৎকালে বলৱৎ হ’ব আৰু পুনৰ নিৰ্দেশ নিদিয়া পৰ্য্যন্ত বাহাল থাকিব।
গেলামালৰ দোকানসমূহে শাক-পাচলি, ফল-মূল আৰু পানী আদি বিক্ৰী কৰিব পাৰিব।
সকলো মাছ-মাংসৰ দোকান ৩১ মাৰ্চলৈকে বন্ধ ৰখাৰ নিৰ্দেশ দিয়া হৈছে। ১ এপ্ৰিলত এই দোকানসমূহ সন্দৰ্ভত পুনৰ মূল্যায়ন কৰা হ’ব।
জিলা উপায়ুক্তসকলক ম’বাইল ভেনত সকলো ঠাইতে এদিন এৰি এদিন শাক-পাচলি যোগানৰ ব্যৱস্থা কৰাৰ বাবে নিৰ্দেশ দিয়া হৈছে।
নাগৰিকসকলক সামাজিক দূৰত্ব বজাই চলিবলৈ আহ্বান জনোৱা হৈছে।
এই নিয়মসমূহৰ উলংঘা কৰিলে আইনমতে ব্যৱস্থা গ্ৰহণ কৰা হ’ব। জিলা উপায়ুক্তসকলক এই নিৰ্দেশনা কঠোৰভাৱে বলৱতৰ নিৰ্দেশ দিয়া হৈছে।
COVID-19 সম্পৰ্কীয় ৰাজ্যিক পৰ্য্যায়ৰ কৰ্ম বাহিনী সমিতিৰ বৈঠকত এই সিদ্ধান্তসমূহ গ্ৰহণ কৰা হৈছে।
গুৱাহাটীত লকডাউনৰ মাজতে শুকুৰবাৰে শাক-পাচলিৰ বজাৰত বহুসংখ্যক লোকে ভিৰ কৰা পৰিলক্ষিত হৈছিল।
প্ৰধান মন্ত্ৰী নৰেন্দ্ৰ মোদীয়ে কৰ’নাভাইৰাছক প্ৰতিহত কৰাৰ বাবে দেশজুৰি ২১ দিনৰ লকডাউন ঘোষণা কৰিছে।
দেশত কৰ’নাভাইৰাছ আক্ৰান্তৰ সংখ্যা শুকুৰবাৰ পৰ্য্যন্ত ৭২৪লৈ বৃদ্ধি পাইছে। চিনাক্ত ৰোগীসকলৰ ভিতৰত আছে ৪৭ গৰাকী বিদেশী নাগৰিক।
কৰ’নাভাইৰাছত আক্ৰান্ত হৈ ১৭ গৰাকী লোক মৃত্যুমুখত পৰিছে। ৬৭ গৰাকী ৰোগীক চিকিৎসাৰ অন্তত যাবলৈ দিয়া হৈছে।
মণিপুৰ আৰু মিজোৰামত এগৰাকীকৈ ৰোগী চিনাক্ত হোৱাৰ পিছত অসমকে ধৰি উত্তৰ-পূবত কোনো নতুন ৰোগী চিনাক্ত হোৱা নাই।
কৰ’নাভাইৰাছত আটাইতকৈ বেয়াকৈ ক্ষতিগ্ৰস্ত হৈছে কেৰালা আৰু মহাৰাষ্ট্ৰ। কেৰালাত কৰ’নাভাইৰাছ আক্ৰান্ত ১৩৭ গৰাকীলৈ বৃদ্ধি পাইছে। মহাৰাষ্ট্ৰত এই সংখ্যা হৈছে ১৩০ (।)