নামনি সোৱণশিৰি জলবিদ্যুৎ প্ৰকল্পৰ বান নিয়ন্ত্ৰণ ব্যৱস্থা: আগতীয়া সতৰ্কবাণীয়ে ৰক্ষা কৰিলে নামনি অঞ্চলৰ সহস্ৰাধিক জনসাধাৰণক

উজনি অঞ্চলত হোৱা ধাৰাসাৰ বৰষুণৰ ফলত সোৱনশিৰি নদীত পানীৰ প্ৰবাহ দ্ৰুতগতিত বৃদ্ধি পোৱাৰ পিছত নামনি সোৱণশিৰি জলবিদ্যুৎ প্ৰকল্পই এক গুৰুত্বপূৰ্ণ ভূমিকা পালন কৰিছে। সোৱণশিৰি নদীৰ ডাপৰিজো আৰু কমলা নদীৰ টামেনত স্থাপন কৰা আগতীয়া সতৰ্কীকৰণ ব্যৱস্থাই নদীখনৰ পানীৰ স্তৰ বৃদ্ধি পোৱাৰ কথা ধৰা পেলায় আৰু প্ৰায় ছয় ঘণ্টা আগতেই সতৰ্কবাণী জাৰি কৰে। এই আগতীয়া সতৰ্কবাণীৰ ভিত্তিত এন এইচ পি চি কৰ্তৃপক্ষই সংশ্লিষ্ট জিলা প্ৰশাসনসমূহক তৎক্ষণাত অৱগত কৰাৰ লগতে নামনি অঞ্চলৰ নদীপাৰত বসবাস কৰা লোকসকলক সম্ভাৱ্য বিপদৰ পৰা সজাগ কৰিবলৈ মাজনিশা চাইৰেন বজায়।

নদীখনৰ পানীৰ প্ৰবাহ প্ৰায় ৭,০০০ কিউমেকৰ পৰা ক্ৰমাগতভাৱে বৃদ্ধি পাই পুৱাৰ ভাগত সৰ্বোচ্চ প্ৰায় ১৩,০০০ কিউমেকলৈ গতি কৰে। সোৱণশিৰি নদীৰ স্বাভাৱিক নিৰাপদ বহন ক্ষমতা প্ৰায় ৭,০০০ কিউমেক যদিও নামনি সোৱণশিৰি জলবিদ্যুৎ প্ৰকল্পৰ জলাশয়ে এই বিশাল বানপানীৰ প্ৰবাহ কিছু পৰিমাণে নিয়ন্ত্ৰণ কৰাত সহায় কৰে। প্ৰকল্পটোৱে ১৩,০০০ কিউমেক সৰ্বোচ্চ প্ৰবাহ নিয়ন্ত্ৰণ কৰি ইয়াৰে প্ৰায় ১২,০০০ কিউমেক পানী পুৱাৰ ভাগত এৰি দিয়ে, যাৰ ফলত নামনি অঞ্চললৈ যোৱা বানৰ ঢৌৰ তীব্ৰতা বহুখিনি হ্ৰাস পায়।

পৰৱৰ্তী সময়ত নদীৰ পানীৰ প্ৰবাহ ক্ৰমে হ্ৰাস পাবলৈ আৰম্ভ কৰে আৰু সন্ধিয়ালৈকে ই প্ৰায় ৭,৫০০ কিউমেকলৈ নামি আহে। স্থানীয় সংবাদ মাধ্যম তথা টেলিভিছন চেনেলসমূহৰ বাতৰি অনুসৰি, সময়মতে জাৰি কৰা আগতীয়া সতৰ্কবাণী আৰু জলবিদ্যুৎ প্ৰকল্পটোৱে গ্ৰহণ কৰা বান নিয়ন্ত্ৰণ ব্যৱস্থাই নামনি অঞ্চলৰ জনসাধাৰণক আগতীয়াকৈ প্ৰস্তুতি চলোৱাত সহায় কৰে। এন এইচ পি চিৰ নামনি সোৱণশিৰি জলবিদ্যুৎ প্ৰকল্পৰ উপদেষ্টা এ এন মহম্মদে জানিবলৈ দিয়া মতে এই তৎপৰতাই নামনি অঞ্চলত এক ডাঙৰ বিপদ ৰোধ কৰাত সহায় কৰে।