গুগল মেপ চাই চাই পালেগৈ যমৰ দুৱাৰ : খালত সোমাল বিলাসী বাহন

গুগল মেপৰ ওপৰত কৰা ভৰসাই যেন কাল হ’ল কেইজনমান যাত্ৰীৰ। গুগল মেপৰ ওপৰত অত্যধিক গুৰুত্ব দি যাত্ৰা কৰাৰ ফলতেই নদীত পৰিলগৈ এখন বিলাসী চাৰিচকীয়া বাহন।

কেৰালাৰ কোট্টাইম জিলাত সংঘটিত হৈছে এই ঘটনা। হায়দৰাবাদৰ পৰা কেৰেলালৈ ফুৰিবলৈ আহিছিল কেইজনমান পৰ্যটক।

শনিবাৰে পুৱা এখন গাড়ীৰে তিনিজন যুৱক আৰু এগৰাকী যুৱতী কেৰেলাৰ আলাপ্পুজালৈ গৈ আছিল। ৰাস্তা চিনি নোপোৱাৰ বাবে গুগল মেপ অনুকৰণ কৰি গাড়ী চলাইছিল গাড়ীখনৰ চালকজনে।

ইতিমধ্যে কেৰালাত বাৰিষা আৰম্ভ হোৱাৰ বাবে অবিৰতভাৱে বৰষুণ দি আছিল। ৰাস্তাটো পানীৰে ভৰি থকাৰ বাবে কোনটো ৰাস্তা, কোনখন নদী সেয়া স্পষ্ট হোৱা নাছিল। গুগল মেপ অনুসৰণ কৰি গৈ থাকোঁতে চালকে পথ বুলি ভাবি গাড়ীখন পথৰ পৰা নদীতেই নমাই দিলে।

তাৰপিছত নদীত ডুবিবলৈ আৰম্ভ কৰে গাড়ীখন। গাড়ীখন ডুবিবলৈ ধৰাত যাত্ৰীসকলে চিঞৰ বাখৰ আৰম্ভ কৰে। সৌভাগ্যক্ৰমে সেই সময়ত স্থানীয় বাসিন্দাসকল ঘটনাস্থলীত উপস্থিত আছিল। আৰক্ষীয়েও সেইৰো অঞ্চলতে তহল দি আছিল। যাৰ বাবে আৰক্ষী আৰু স্থানীয় লোকৰ সহযোগত যাত্ৰীসকলক তাৎক্ষণিকভাবে উদ্ধাৰ কৰা হয়। বৰ্তমান আটাই কেইজন যাত্ৰী সুস্থ বুলি জানিব পৰা হৈছে।

উল্লেখ্য যে কেইমাহমান আগতে তামিলনাডুতো প্ৰায় একেই ঘটনা ঘটিছিল। গুগল মেপ অনুসৰণ কৰি চিৰিৰ মাজত এখন গাড়ী আবদ্ধ হৈ পৰিছিল।

ইয়াৰ পূৰ্বে যোৱা বছৰ গুগল মেপ অনুকৰণ কৰি গৈ থকা অৱস্থাত কেৰালাৰ এখন নদীত পৰি দুজন চিকিৎসকৰ মৃত্যু হৈছিল।