মাদ্ৰাছাসমূহ সাংবিধানিক প্ৰমূল্যৰ বাবে বিপদ নহয়ঃ উচ্চতম ন্যায়ালয়
উচ্চতম ন্যায়ালয়ে মঙলবাৰে (২২ অক্টোবৰ) মাদ্ৰাছা, বৈদিক বিদ্যালয়, বৌদ্ধ মঠৰ দৰে প্ৰতিষ্ঠানৰ গুৰুত্বৰ ওপৰত আলোকপাত কৰি কয় যে একাধিক সংস্কৃতি আৰু ধৰ্ম থকা দেশত এনে প্ৰতিষ্ঠানক সাংবিধানিক নীতিৰ প্ৰতি ভাবুকি হিচাপে গণ্য কৰা উচিত নহয়।
হিন্দুস্তান টাইমছৰ প্ৰতিবেদন অনুসৰি, উত্তৰ প্ৰদেশ মাদ্ৰাছা শিক্ষা ব’ৰ্ড আইন ২০০৪ক অসাংবিধানিক বুলি ঘোষণা কৰা এলাহাবাদ উচ্চ ন্যায়ালয়ৰ সিদ্ধান্তক প্ৰত্যাহ্বান জনাই মঙলবাৰে উচ্চতম ন্যায়ালয়ে পুনৰবাৰ শুনানি গ্ৰহণ কৰে। এই গোচৰত সৰ্বোচ্চ ন্যায়ালয়ে সকলো পক্ষৰ যুক্তি শুনাই নিজৰ সিদ্ধান্ত সংৰক্ষণ কৰি ৰাখিছে।
শুনানিৰ সময়ত ভাৰতৰ মুখ্য ন্যায়াধীশ ধনঞ্জয় ৱাই চন্দ্ৰচুড়ৰ নেতৃত্বত এখন বিচাৰপীঠে গুৰুত্ব আৰোপ কৰে যে এই শিক্ষানুষ্ঠানসমূহ নিয়ন্ত্ৰণ কৰা আৰু ধৰ্মীয় শিক্ষাৰ সমান্তৰালকৈ শিশুসকলে যাতে আধুনিক শিক্ষা লাভ কৰে , সেয়া ৰাজ্যৰ দায়িত্ব।
উল্লেখ্য যে চি জে আইৰ লগতে ন্যায়াধীশ জে বি পাৰ্দিৱালা আৰু ন্যায়াধীশ মনোজ মিশ্ৰকো এই বিচাৰপীঠত অন্তৰ্ভুক্ত কৰা হৈছে।
বিচাৰপীঠে আৰু কয় যে মাদ্ৰাছা ব্যৱস্থাৰ পাঠ্যক্ৰমৰ ত্ৰুটিৰ বাবে সমগ্ৰ আইনখন বাতিল হ’ব নালাগে। এই অভাৱসমূহ দূৰ কৰিবলৈ বৰ্তমানৰ আইনসমূহৰ অধীনত ৰাজ্যৰ ব্যাপক ক্ষমতা আছে।
এই বিষয়টো সন্দৰ্ভত সোমবাৰেও শুনানি গ্ৰহণ কৰা হৈছিল। এনে পৰিস্থিতিত মঙলবাৰে একেৰাহে দ্বিতীয় দিনৰ বাবে বিচাৰপীঠে মূলতঃ উত্তৰ প্ৰদেশ চৰকাৰ আৰু শিশু অধিকাৰ সুৰক্ষা আয়োগৰ হৈ হাজিৰ হোৱা অতিৰিক্ত ছলিচিটৰ জেনেৰেল (এ এছ জি) কে এম নটৰাজৰ যুক্তি শুনানি গ্ৰহণ কৰে।
এই গোচৰত এলাহাবাদ উচ্চ ন্যায়ালয়ৰ সিদ্ধান্তৰ বিৰোধিতা কৰি আবেদনকাৰীৰ হৈ জ্যেষ্ঠ অধিবক্তা অভিষেক মনু সিংৱী, মুকুল ৰোহাটগী, ছলমান খুৰশ্বিদ, মানেকা গুৰুস্বামী আৰু এম আৰ ছামছাদে প্ৰতিনিধিত্ব কৰিছিল।