বৰ্বৰ! মহাৰাষ্ট্ৰত মহিলাক কাঁচিৰে ৰেপি হত্যা লিভ ইন পাৰ্টনাৰৰ

দিল্লীৰ নৃশংস শ্ৰদ্ধা ৱাকাৰ হত্যাকাণ্ড আৰু নিকি যাদৱ হত্যাকাণ্ডৰ পিছত লিভ ইন পাৰ্টনাৰৰ হাতত প্ৰাণ হেৰুৱাবলগীয়া হৈছে আন এগৰাকী মহিলাই। এইবাৰ এই ঘটনা সংঘটিত হৈছে মহাৰাষ্ট্ৰত। ৰাজ্যখনৰ থানে চহৰত এগৰাকী ৩৪ বছৰীয়া মহিলাক তেওঁৰ লিভ ইন পাৰ্টনাৰে হত্যা কৰাৰ অভিযোগ উত্থাপন হৈছে।

দেওবাৰে মাজনিশা সংঘটিত হৈছে এই নৃশংস হত্যাকাণ্ড। মহিলাগৰাকীৰ হত্যাৰ অভিযোগত আৰক্ষীয়ে ইতিমধ্যে ৱাগলে এষ্টেট অঞ্চলৰ পৰা অভিযুক্ত লিভ ইন পাৰ্টনাৰ ৩৫ বছৰীয়া ব্যক্তিগৰাকীক গ্ৰেপ্তাৰ কৰিছে।

স্থানীয় এগৰাকী শীৰ্ষ আৰক্ষী বিষয়াই জানিবলৈ দিয়া মতে, নিশা প্ৰায় ১ বজাত কিষাণ নগৰৰ এটা ঘৰত তেজেৰে তুমুৰলি অৱস্থাত উদ্ধাৰ হয় সুনীতা অমৰ কাম্বলে নামৰ মহিলাগৰাকীৰ মৃতদেহ।

স্বামীৰ পৰা বিচ্ছেদ হোৱাৰ পিছত অভিযুক্তৰ সৈতে বাস কৰিছিল মহিলাগৰাকী। দুয়ো প্ৰায়ে ক্ষুদ্ৰ ক্ষুদ্ৰ বিষয়ক লৈ কাজিয়াত লিপ্ত হোৱাৰ কথা জানিব পৰা গৈছে বুলি আৰক্ষী বিষয়াগৰাকীয়ে উল্লেখ কৰিছে।

দেওবাৰে নিশা এনে এক বিবাদৰ পাছতে অভিযুক্তই মহিলাগৰাকীক কাঁচিৰে আক্ৰমণ কৰি থিতাতে হত্যা কৰে বুলিও তেওঁ লগতে কয়। ইয়াৰ পিছতে অভিযুক্তই হত্যাত ব্যৱহৃত কাঁচি আৰু ভুক্তভোগীৰ মোবাইল ফোন পেলাই দি প্ৰমাণ ধ্বংস কৰাৰ চেষ্টা কৰে বুলিও বিষয়াগৰাকীয়ে সদৰী কৰিছে।

ধৃত অভিযুক্তৰ বিৰুদ্ধে ভাৰতীয় দণ্ডবিধিৰ ৩০২ আৰু ২০১ ধাৰাত গোচৰ ৰুজু কৰা হৈছে বুলিও তেওঁ লগতে কয়।