ঘৰত প্ৰৱেশ কৰি ছইফক উপৰ্যুপৰি ছুৰীৰে আঘাত; আৰক্ষীৰ জালত সন্দেহযুক্ত আততায়ী

বলীউডৰ অভিনেতা ছইফ আলী খানৰ ওপৰত সংঘটিত আক্ৰমণৰ সৈতে জড়িত এজন সন্দেহযুক্ত লোকক গ্ৰেপ্তাৰ কৰিছে আৰক্ষীয়ে। তেওঁক বান্দ্ৰা থানালৈ লৈ যোৱা হয়। তাত তেওঁক জেৰা চলি আছে। অৱশ্যে বুধবাৰে মাজনিশা হঠাতে অভিনেতাজনৰ ঘৰত প্ৰৱেশ কৰি আক্ৰমণ কৰা ব্যক্তিজনেই নেকি সেয়া এতিয়াও স্পষ্টকৈ উল্লেখ কৰা নাই মুম্বাই আৰক্ষীয়ে।

সূত্ৰৰ পৰা জানিব পৰা মতে, শুকুৰবাৰে পুৱা বান্দ্ৰা ষ্টেচনৰ দলংত উঠি থকা দেখা গৈছিল ছইফ আলী খানৰ আক্ৰমণকাৰীক। চিচিটিভি কেমেৰাত বন্দী হয় আততায়ীৰ ছবি। আৰক্ষীয়ে সন্দেহ প্ৰকাশ কৰিছে যে তেওঁ স্থানীয় ৰে’লত উঠি ভাছাই অঞ্চললৈ পলায়ন কৰিবলৈ চেষ্টা কৰিছিল।

মুম্বাই আৰক্ষীৰ মুঠ ২০টা দলে ছোটে নবাবৰ ঘৰত আক্ৰমণ কৰা দুৰ্বৃত্তৰ সন্ধানত অভিযান অব্যাহত ৰাখিছে। বান্দ্ৰা আৰু ইয়াৰ আশে-পাশে থকা অঞ্চলত এক নিছিদ্ৰ অনুসন্ধান চলি আছে।

তদন্তৰ অন্তত আৰক্ষীয়ে গম পায় যে ছইফ আলী খানৰ ঘৰৰ ভিতৰত চিচিটিভি কেমেৰা নাই। ষষ্ঠ মহলাৰ চিৰিৰ ওপৰত দেখা গৈছিল দুৰ্বৃত্তটোক। ফায়াৰ ছেফ্টিৰে নামি তেওঁ চাগে পিছফালৰ দুৱাৰেদি পলায়ন কৰিছিল। এই কথা আৰক্ষীৰ সূত্ৰই প্ৰকাশ কৰিছে। অৱশ্যে ঘৰটোত প্ৰৱেশৰ কোনো ফুটেজ দেখা পোৱা নগ’ল। ঘটনাৰ প্ৰায় দুঘণ্টা আগলৈকে কোনো সন্দেহযুক্ত লোক বাহিৰৰ পৰা বাসগৃহত প্ৰৱেশ কৰা নাছিল।

ছইফ-কৰিনাৰ কনিষ্ঠ পুত্ৰ জেহাৰৰ কোঠাত কেনেকৈ উপস্থিত হ’ল অপৰাধী? ল’ৰা-ছোৱালীকেইটা চোৱা-চিতা কৰাৰ দায়িত্বত থকা এগৰাকী গৃহকৰ্মীয়ে দাবী কৰিছে যে লোকজনে জেহাৰৰ কোঠাৰ সন্মুখত থিয় হৈ ১ কোটি টকা দাবী কৰিছিল। সন্তানকেইটাৰ কোঠা ক’ত আছে সি ইতিমধ্যে গম পাইছিল নেকি? কোনো বাধা নোহোৱাকৈ কেনেকৈ সেই কোঠা পালে? একাধিক প্ৰশ্ন উত্থাপন হৈছে।