মাজুলীত অসম ভাওনা সমাৰোহৰ ব্যাপক প্ৰস্তুতি; প্ৰদৰ্শিত হ’ব মুঠ ২৮খন ভাওনা

২০০৬ চনৰ পৰা প্ৰতি দুবছৰৰ মূৰে মূৰে অনুষ্ঠিত হৈ অহা অসম ভাওনা সমাৰোহ এইবাৰ অষ্টম বৰ্ষত আউনীআটী সত্ৰৰ সমীপৰ মনিকাঞ্চন ৰংগক্ষেত্ৰত অনুষ্ঠিত কৰাৰ ব্যাপক প্ৰস্তুতি চলিছে। ১৯ জানুৱাৰীৰ পৰা ১ ফেব্ৰুৱাৰীলৈকে অনুষ্ঠিত হ’বলগীয়া সমাৰোহ খনিত প্ৰদৰ্শিত হ’ব মুঠ ২৮খন ভাওনা।

আজি উদযাপন সমিতিৰ এখন গুৰুত্বপূৰ্ণ সভাত সমাৰোহৰ কাৰ্যসূচী উন্মোচন কৰে উদযাপন সমিতিৰ সভাপতি তথা আউনীআটী সত্ৰৰ সত্ৰাধিকাৰ ডo পীতাম্বৰ দেৱগোস্বামীয়ে।

সমাৰোহৰ প্ৰতিদিনে ভাওনা উদ্বোধন কৰিব সংগীত শিল্পী অংগৰাগ মহন্ত, অভিনেতা যতীন বৰা প্ৰমূখ্যে বহু কেইজন শিল্পী, সাংস্কৃতিক কৰ্মী, সমাজকৰ্মী  আৰু সত্ৰাধিকাৰে। শেষৰ দিনা “ভাওনা ৰত্ন”, “ভাওনা মহিয়ান” আৰু অসমৰ বিভিন্ন প্ৰান্তৰ ২০গৰাকী সাহিত্য, সংস্কৃতি, কলা সাধকক সম্বৰ্ধনা জনোৱা হ’ব।

সমাৰোহৰ কাৰ্যসূচী অনুসৰি ১৯ ফেব্ৰুৱাৰী পুৱা ৮-৩০ বজাত ধৰ্মধ্বজা উত্তোলন কৰিব উদযাপন সমিতিৰ সভাপতি পীতাম্বৰ দেৱগোস্বামীয়ে। ৯ বজাত মনিকূটৰ দ্বাৰ মুকলি আৰু নাম প্ৰসংগ। ১০ বজাত প্ৰদৰ্শনীৰ দ্বাৰ মুকলি কৰিব মাজুলী জিলাৰ উপায়ুক্ত বিক্ৰম কৈৰীয়ে।

ভোজনালয়ৰ দ্বাৰ উদ্ঘাটন কৰিব ডিব্ৰুগড়ৰ চিকিৎসক ডাঃ হেমহৰি পেগুৱে । ১০-৩০ বজাত গ্ৰন্থমেলা উন্মোচন কৰিব চিকিৎসক ডাঃ অখিল হাজৰিকাই। ১১ বজাত দুহেজাৰ গৰাকী নামলগোৱাৰ নামৰ ধ্বনিৰে উদ্বোধনী সভাত সভাপতিত্ব কৰিব পীতাম্বৰ দেৱগোস্বামীয়ে। সন্মানীয় অতিথিৰ আসনত থাকিব সত্ৰাধিকাৰ সকলৰ লগতে উজ্জয়নী মহামণ্ডলেশ্বৰৰ কেশব দাস।

নামঘৰ ইতিহাস, গ্ৰন্থ উন্মোচন কৰিব নলবাৰীৰ কুমাৰ ভাস্কৰ বৰ্মা সংস্কৃত আৰু পুৰাতন অধ্যয়ন বিশ্ববিদ্যালয়ৰ উপাচাৰ্য অধ্যাপক দীপক শৰ্মাই । স্মাৰক গ্ৰন্থ উন্মোচন কৰিব মাজুলী সাংস্কৃতিক বিশ্ববিদ্যালয়ৰ উপাচাৰ্য ডম্বৰুধৰ নাথে। সভাত অসমৰ বহু কেইজন বিশিষ্ট ব্যক্তি উপস্থিত থাকিব ।

বিয়লি ১ বজাত যোৰহাট মঞ্জুলা কলা কেন্দ্ৰই পৰিবেশ কৰিব “ৰাম বিজয়” নাট। সন্ধিয়া বন্তি প্ৰজ্বলন কৰিব আউনীআটী সত্ৰৰ ডেকা সত্ৰাধিকাৰ দেবানন্দ গোস্বামীয়ে। সন্ধিয়া ৫ বজাত প্ৰতিযোগিতাৰ প্ৰথম নিশাৰ ভাওনা উদ্বোধন কৰিব গায়ক অংগৰাগ মহন্তই ।

প্ৰথম দৰ্শনীৰ ভাওনা মাজুলীৰ বাঘৰ গাঁও শংকৰ জ্যোতি শিল্পী সমাজৰ- দধিচী মুনিৰ অস্থিদান, বৃত্ৰাসুৰ বধ। ২য় দৰ্শনীৰ ভাওনা উত্তৰ গুৱাহাটীৰ বিহলঙনী বৰনামঘৰৰ- তুলসী উদ্ধাৰ, শংখচূড় বধ।