দিনটোৰ সম্ৰাট! হঠাতে ব্যৱসায়ীৰ একাউণ্টত সোমাল ১২ হাজাৰ কোটি টকা, তাৰপিছত?

আঠ ঘণ্টাৰ বাবে মুকুটবিহীন সম্ৰাট! কিন্তু মুহূৰ্তৰ ভিতৰতে খহি পৰিল সপোন। ভাগ্য সুপ্ৰসন্ন বুলি ভগৱানক ধন্যবাদ দিবলৈ গৈও ৰৈ গ’ল এক ব্যৱসায়ী। গুজৰাটৰ বাসিন্দা ৰমেশ সাগৰ হঠাতে পাঁচ-দহ লাখ নহয়, প্ৰায় ১২,০০০ কোটি টকাৰ গৰাকী হৈ পৰিল। সেই বেলেন্স তেওঁৰ ডেমাট একাউণ্টত সোমাইছিল।

স্বাভাৱিকতে ৰমেশৰ চকু কপালত উঠিল। অৱশ্যে শ্বেয়াৰ ক্ৰয় কৰাৰ অভ্যাস থকাৰ বাবে ধনৰ পৰিমাণটো দেখি অলপ বিব্ৰত হৈ পৰে। কপাল ফুলা বুলি ভাৱি নিজকে আশ্বস্ত কৰে। তাৰ পিছত অৱশ্যে নিজৰ ভুল বুজিব পাৰে।

লগতে পঢ়ক: পাকিস্তানৰ প্ৰধানমন্ত্ৰী শ্বাহবাজ শ্বৰীফে ক’লে, ’৭৫ বছৰ ধৰি ভিক্ষাৰ পাত্ৰ লৈ ঘূৰি ফুৰিছো’

ৰমেশ সাগৰ আহমেদাবাদৰ বাসিন্দা। পাঁচৰ পৰা ছয় বছৰ ধৰি তেওঁ শ্বেয়াৰ বজাৰত সামান্য বিনিয়োগ কৰি আহিছে। এবছৰ আগতে তেওঁ এটা ডেমেট একাউণ্ট খুলিছিল।

জানিব পৰা মতে, যোৱা ২৬ জুলাইত তেওঁৰ ডেমেট একাউণ্টত ১১,৬৭৭ কোটি টকা জমা হয়। প্ৰথমে চক খাই গ’লেও ৰমেশে পিছত সেই টকাৰ পৰা শ্বেয়াৰ বজাৰত ২ কোটি টকা বিনিয়োগ কৰে। কিছু সময়ৰ ভিতৰতে ফলাফল পালে। তেওঁ ২ কোটি টকা বিনিয়োগ কৰি ৫ লাখ টকা উপাৰ্জন কৰে।

অৱশ্যে, বেছিসময় তেওঁ এই হাজাৰ কোটি টকাৰ গৰাকী হৈ থাকিব নোৱাৰিলে। প্ৰায় আঠ ঘণ্টাৰ পিছতে সেই সন্ধিয়াই ৰমেশ সাগৰৰ ডেমেট একাউণ্টৰ পৰা বৃহৎ পৰিমাণৰ ধন নোহোৱা হৈ পৰে। তাৰ পিছত তেওঁ বেংকৰ পৰা এটা বাৰ্তা পায়। তাত কোৱা হয় যে কাৰিকৰী ত্ৰুটিৰ বাবে তেওঁৰ একাউণ্টত কিবা ভুল হৈছিল। বেঙ্কে ইয়াৰ বাবে ক্ষমা বিচাৰিছে।

পিছত জানিব পৰা যায় যে কেৱল ৰমেশ সাগৰেই নহয়, সেই নিৰ্দিষ্ট দিনটোত আন বহুতো ডেমেট একাউণ্টত এইদৰে বৃহৎ পৰিমাণৰ ধন জমা হৈছিল। কিন্তু সেই টকা কেইঘণ্টামানতকৈ বেছি সময় থকা নাছিল। মুহূৰ্ততে সাধাৰণ লোক এজন সম্ৰাট হৈ পৰি পুনৰ সাধাৰণ অৱস্থালৈ ঘুৰি আহিল আৰু নাটকখনৰো যৱনিকা পৰিল।

লগতে পঢ়ক: আৰু কিমান প্ৰমাণ লাগে?-মুখ্যমন্ত্ৰী আৰু আৰক্ষী সঞ্চালক প্ৰধানলৈ ডি ৱাই এফ আইৰ মুকলি প্ৰশ্ন

এনে ঘটনা আগতেও ঘটিছিল। কেইদিনমান আগতে, উত্তৰ প্ৰদেশৰ এজন দৰিদ্ৰ শ্ৰমিক বিহাৰীলালে তেওঁৰ বেংক একাউণ্টৰ পৰা ১০০ টকা উলিয়াইছিল। তাৰ পিছত বেংকৰ বাৰ্তাত তেওঁক জনোৱা হয় যে তেওঁৰ বাকী বেলেন্স আছে ৩ হাজাৰ কোটি টকা। বিহাৰীৰ মূৰ ঘূৰি যায়। সদায় ঘটাৰ দৰে পিছত বুজি পোৱা গ’ল যে বেংকৰ ভুলৰ বাবেই তেনে ঘটিছিল।