ওদালগুৰিত হাতীৰ গচকত প্ৰাণ গ’ল এজন যুৱকৰ

ওদালগুৰিৰ ভাৰত-ভুটান সীমান্তত অৱস্থিত গাঁও সমূহত অব্যাহত আছে হাতী-মানুহৰ সংঘাত। সোমবাৰে নিশা জিলাখনৰ হৰিশিঙা থানাৰ অন্তৰ্গত বনগুৰুমত হাতীৰ আক্ৰমণত থিতাতে প্ৰাণ গ’ল বেনে খেড়িয়া নামৰ এজন যুৱকৰ।

হাতীৰ আক্ৰমণত কৰুণ মৃত্যুক আকোঁৱালি লোৱা যুৱকজনৰ ঘৰ কোৰোমোৰ চাহ বাগিচাত বুলি জানিব পৰা গৈছে।

প্ৰাপ্ত তথ্য মতে যুৱকজনে নিশা বনগুৰুম গিৰ্জাত কাম কৰি নিজৰ ঘৰলৈ উভতি আহি থাকোতে এটা বনৰীয়া হাতীয়ে আক্ৰমণ কৰিছিল। যাৰ ফলত ঘটনাস্থলতে মৃত্যুক আকোঁৱালি লৈছিল যুৱকজনে।

ইফালে জিলাখনৰে পানেৰী আৰক্ষী থানাৰ অন্তৰ্গত নৈনাপাৰা চাহ বাগিচাৰ বাসিন্দা তিৰলা মুন্দা বুলি এগৰাকী মহিলাৰ ঘৰতো সন্ত্ৰাসৰ সৃষ্টি কৰে বনৰীয়া হাতীয়ে। হাতীৰ জাকে মহিলাগৰাকীৰ ঘৰ ভাঙি লণ্ড ভণ্ড কৰাৰ উপৰি বহু মূল্যৱান সম্পত্তিও নষ্ট কৰে।