প্ৰেমত প্ৰতাৰণা; আই চি য়ুতে বলপূৰ্বকভাৱে যুৱতীৰ সৈতে বিবাহ পাশত আবদ্ধ হ’বলৈ বাধ্য কৰালে যুৱকক
আত্মহত্যাৰ চেষ্টা চলাই পুনেৰ এখন চিকিৎসালয়ৰ আই চি য়ুত ভৰ্তি হৈ থকা এগৰাকী যুৱতীৰ সৈতে এজন যুৱকক বলপূৰ্বকভাৱে বিবাহ পাশত আৱদ্ধ হ’বলৈ বাধ্য কৰা হৈছে।
আৰক্ষী সূত্ৰই প্ৰকাশ কৰা মতে, বিবাহ পাশত আৱদ্ধ হ’বলৈ বাধ্য কৰা সুৰজ নালাভাদেৰ নামৰ যুৱকজনৰ সৈতে যুৱতীগৰাকীৰ প্ৰেমৰ সম্পৰ্ক আছিল।
আনহাতে, মহিলাগৰাকীয়ে যুৱকজনৰ বিৰুদ্ধে এটা ধৰ্ষণৰ গোচৰো ৰুজু কৰিছিল।
‘‘যুৱতী গৰাকীয়ে দাবী কৰা মতে, নালাভাদে প্ৰথমে তেওঁক শাৰীৰিক সম্পৰ্ক স্থাপনৰ বাবে বাধ্য কৰিছিল আৰু তাৰ পাছত যেতিয়া তেওঁ বিয়াৰ প্ৰস্তাৱ দিছিল যুৱকজনে তেওঁক নীচ জাতিৰ বুলি সেই প্ৰস্তাৱ অস্বীকাৰ কৰিছিল,’’ আৰক্ষী সূত্ৰত প্ৰকাশ।
সমগ্ৰ ঘটনাৰ পাছত শোকদগ্ধ হৈ পৰা যুৱতী গৰাকীয়ে বিষপান কৰে। বিষপান কৰাৰ পাছত যুৱতী গৰাকীক চিকিৎসালয়ৰ আই চি য়ুত ভৰ্তি কৰোৱা হয়।
যুৱতী গৰাকীয়ে বাস কৰা অঞ্চলৰ কিছুসংখ্যক স্থানীয় লোকে নালাভাদেক আটক কৰে আৰু আৰু চিকিৎসালয়লৈ লৈ গৈ আই চি য়ুৰ ভিতৰতে যুৱতী গৰাকীক বিয়া কৰাবলৈ বাধ্য কৰায়।
বিয়াৰ তিনিদিন পাছতে নালাভাদে পলাই যায় আৰু যুৱতী গৰাকীৰ সৈতে মোবাইলকে ধৰি থকা সকলো ধৰণৰ সংযোগ ত্যাগ কৰে।
বৰ্তমান যুৱতী গৰাকীয়ে পলাতক স্বামীক বিচাৰি আৰক্ষী থানাত এখন এজাহাৰ দাখিল কৰিছে।