১৪ মহীয়া গৃহবন্দিত্বৰ পৰা মুক্ত হ’ল কাশ্মীৰৰ প্ৰাক্তন মুখ্যমন্ত্ৰী মেহবুবা মুফটি
সুদীৰ্ঘ ১৪ মহীয়া গৃহবন্দিত্বৰ পৰা মুক্ত হ’ল জম্মু-কাশ্মীৰৰ প্ৰাক্তন মুখ্যমন্ত্ৰী মেহবুবা মুফটি ।
কাশ্মীৰৰ পৰা কেন্দ্ৰীয় চৰকাৰে ২০১৯ চমৰ ৫ আগষ্টৰ দিনা সংবিধানৰ ৩৭০ অনুচ্ছেদ বাতিল কৰাৰ পিছতে আৰক্ষীয়ে আইন-শৃংখলা পৰিস্থিতিৰ অৱনতিৰ আশংকা কৰি মেহবুবা মুফটিৰ লগতে আন বহু কেইগৰাকী শীৰ্ষ স্থানীয় লোকক গৃহ বন্দী কৰিছিল।
মেহবুবা মুফটিক দীৰ্ঘ দিন ধৰি গৃহবন্দী কৰি ৰখাৰ বিৰুদ্ধে মেহবুবাৰ কন্যাই উচ্চতম ন্যায়ালয়তো আবেদন জনাইছিল।
উল্লেখ্য কাশ্মীৰৰ পৰা সংবিধানৰ ৩৭০ অনুচ্ছেদ বাতিল কৰাৰ পিছতে চৰকাৰে কাশ্মীৰৰ প্ৰাক্তন মুখ্যমন্ত্ৰী ওমৰ আব্দুল্লাৰ লগতে ফাৰুক আব্দুল্লাকো গৃহবন্দী কৰিছিল যদিও চলিত বৰ্ষৰ মাৰ্চ মাহত তেওঁলোক দুয়োকো গৃহবন্দিত্বৰ পৰা মুক্তি দিয়া হৈছিল।
মেহবুবা মুফটিক গৃহ বন্দিত্বৰ পৰা মুক্তি দিয়াৰ পিছতে মেহবুবাই এক অডিঅ’ টেপ যোগে কয় যে ভাৰত চৰকাৰে কাশ্মীৰৰ পৰা সংবিধানৰ ৩৭০ অনুচ্ছেদ বাতিল কৰি কাশ্মীৰৰ জনতাৰ অধিকাৰ কাঢ়ি নিছে।
এদিন চৰকাৰৰ পৰা সেই অধিকাৰ ঘূৰাই আনিবলৈ তেওঁলোক সক্ষম হ’ব বুলি মেহবুবাই তেওঁৰ অডিঅ’ টেপটোত প্ৰকাশ কৰিছে।
ইপিনে দুদিন পূৰ্বে গৃহবন্দিত্বৰ পৰা মুক্ত ফাৰুক আব্দুল্লাই চীনৰ সহযোগত কাশ্মীৰী জনতাই তেওঁলোকৰ হেৰুওৱা অধিকাৰ উভতাই আনিবলৈ সক্ষম হ’ব বুলি মন্তব্য কৰিছিল।