কৰ্কট প্ৰতিষ্ঠানৰ নিৰ্মাণ সন্দৰ্ভত ৰতন টাটাক সাক্ষাৎ মন্ত্ৰী হিমন্তৰ
টাটা ট্ৰাষ্টৰ সহযোগিতাত ৰাজ্যত নতুনকৈ স্থাপন হ’বলগীয়া ১৯ খন কৰ্কট প্ৰতিষ্ঠানৰ নিৰ্মাণ সন্দৰ্ভত বুধবাৰে মন্ত্ৰী হিমন্ত বিশ্ব শৰ্মাই টাটা ট্ৰাষ্টৰ অধ্যক্ষ ৰতন টাটা আৰু উপাধ্যক্ষ বিজয় সিঙক সাক্ষাৎ কৰে।
মন্ত্ৰী শৰ্মাই টাটাৰ সৈতে ৰাজ্যত প্ৰস্তাৱিত কৰ্কট চিকিৎসালয় সমূহৰ প্ৰথম পৰ্যায়ৰ নিৰ্মাণৰ কাম আৰম্ভ কৰাৰ সন্দৰ্ভত বিস্তৃত ৰূপত আলোচনা কৰে। তদুপৰি উক্ত বৈঠকতে আছাম কেঞ্চাৰ কেয়াৰ ফাউণ্ডেশ্যনৰ প্ৰকল্প আৰু কাম-কাজৰো পৰ্যালোচনা কৰা হয়।
মন্ত্ৰী গৰাকীয়ে এই সাক্ষাতৰ কথা টুইটাৰৰ জৰিয়তে জানিবলৈ দি কয় যে চিকিৎসালয় কেইখনৰ নিৰ্মাণ কাৰ্য সম্পূৰ্ণ হৈ উঠিলে ৰাজ্যৰ কৰ্কট ৰোগীসকল যথেষ্ট পৰিমানে উপকৃত হ’ব।
আনহাতে অহা ১০-১৫ মাহৰ ভিতৰত ৰাজ্যিক কৰ্কট প্ৰতিষ্ঠানৰ সম্প্ৰসাৰনৰ উপৰি ১০টা কৰ্কট কেন্দ্ৰ শুভাৰম্ভ কৰা হ’ব বুলিও মন্ত্ৰী শৰ্মাই টুইটটোৰ জৰিয়তে উল্লেখ কৰে।
1/2 Met Chairman of @tatatrusts Shri @RNTata2000 along with Vice Chairman Shri Vijay Singh & discussed kickoff of the first phase of construction of Network of Cancer Hospitals in #Assam. Once completed these hospitals will bring much-needed relief to cancer patients across State pic.twitter.com/CZTAaT5HY7
— Himanta Biswa Sarma (@himantabiswa) July 3, 2019
উল্লেখ্য যে টাটা ট্ৰাষ্টৰ সহযোগিতাত ৰাজ্য চৰকাৰে গ্ৰহণ কৰা এই অভিলাষী প্ৰকল্পৰ জৰিয়তে ৰাজ্যখনৰ লগতে উত্তৰ-পূবৰ লোকসকলক সুলভ স্বাস্থ্য সেৱা উপলব্ধ কৰাৰ পৰিকল্পনা গ্ৰহণ কৰিছে।