কৃষ্ণাইত চলন্ত গাড়ীত যাত্ৰীক নিচাযুক্ত দ্ৰব্য খুৱাই লুটিলে নগদ ধন

অচিনাকি লোকৰ ব্যক্তিগত বাহত ভ্ৰমণ কৰাৰ পৰা বিৰত থাকক, অন্যথা বিপদত পৰিব পাৰে আপুনি৷ গোৱালপাৰাৰ কৃষ্ণাইত আজি সংঘটিত তেনে এক ঘটনাত দুৰ্বৃত্তই এজন ব্যক্তিৰ পৰা লুটি নগদ ধন৷

ঘটনা অনুসৰি আজি গুৱাহাটীৰ পৰা গোৱালপাৰালৈ যাত্ৰী কৰিঢ়াই অনা এখন ব্যক্তিগত বাহনত কৃষ্ণাইৰ টেঙাবাৰীৰ এজন লোকক নিচাযুক্ত দ্ৰব্য খুৱাই গাড়ীখনৰ চালককে ধৰি দুজন লোকে লুটি নিলে নগদ ২২ হাজাৰ টকা। পিছত অচেতন অৱস্থাত সন্ধিয়া কৃষ্ণাইৰ বেকীপুলৰ পৰা আৰক্ষীয়ে লোক জনক উদ্ধাৰ কৰে।

জানিব পৰা মতে কৰ্মসূত্ৰে যোৰহাটত থকা জিয়াৰুল ইছলামে নিজৰ আত্মীয়ৰ বেমাৰৰ খবৰ পাই যোৰহাটৰ পৰা ঘৰলৈ বুলি অহাৰ পথত গুৱাহাটীৰ আই এছ বি টিত গোৱালপাৰাৰ বাছৰ বাবে ৰৈ আছিল৷ সেই সময়তে তাত বাছ নথকাৰ সুযোগ বুজি এখন এ এছ ০১ এ এক্স ৬৮২০ চুইফ ডিজায়াৰত থকা দুজন লোকে তেওঁক ক’লৈ যাব বুলি সুধে আৰু তেওঁলোক গোৱালপাৰালৈ যাব বুলি জানি জিয়াৰুল ৰহমান গাড়ীখনত উঠি দিয়ে।

ইয়াৰ পিছতে সুযোগ বুজি লোক দুজনে জিয়াৰুল ৰহমানক নিচাযুক্ত দ্ৰব্য খুৱাই তেওঁৰ পৰা নগদ ২২ হাজাৰ টকা লুটি ৰহমানক কৃষ্ণাইৰ বেকীপুলত পেলাই থৈ যায়।

অৱশ্যে ঘটনাৰ খবৰ লাভ কৰি কৃষ্ণাই আৰক্ষীয়ে অতি তৎপৰতাৰে ৰহমানক উদ্ধাৰ কৰি গাড়ীখনৰ সৈতে ঘটনাত জড়িত লোক দুজনক কৃষ্ণাইৰ মোলানডুবীত আটক কৰে। আটককাধীন লোক দুজনক মেঘালয়ৰ তুৰাৰ তাইজুদ্দিন সেখ আৰু ধুবুৰীৰ লিয়াকত আলী বুলি চিনাক্ত কৰা হৈছে৷ ঘটনাৰ সন্দৰ্ভত আৰক্ষীয়ে বৰ্তমান তদন্ত অব্যাহত ৰাখিছে৷