ৰিলছ বনোৱাই কাল হ’ল নেকি? কোকৰাঝাৰত সন্ধানহীন মহিলা; সৰবৰাহকাৰী চক্ৰৰ হাতত পৰাৰ আশংকা

কোকৰাঝাৰ জিলাৰ ভুটিয়াপাৰাত এগৰাকী মহিলা সন্দেহজনক পৰিস্থিতিত সন্ধানহীন হোৱা ঘটনাই অঞ্চলটোত তীব্ৰ চাঞ্চল্যৰ সৃষ্টি কৰিছে। নিৰুদ্দেশ হোৱা মহিলাগৰাকী ভুটিয়াপাৰাৰ নিবাসী প্ৰদীপ নাথৰ পত্নী প্ৰীতি নাথ (৩৫) বুলি চিনাক্ত কৰা হৈছে। সামাজিক মাধ্যমৰ জৰিয়তে ব্লেকমেইল, আৰ্থিক শোষণ আৰু সম্ভাব্য মানৱ সৰবৰাহকাৰী চক্ৰৰ বলি হোৱাৰ আশংকাত বৰ্তমান পৰিয়ালটো ম্ৰিয়মাণ হৈ পৰিছে।

পৰিয়ালৰ সদস্যসকলে জনোৱা মতে, প্ৰীতি নাথ সামাজিক মাধ্যমত যথেষ্ট সক্ৰিয় আছিল আৰু চুটি ভিডিঅ’ (Reels) নিৰ্মাণ কৰিছিল। স্বামীৰ সন্দেহ অনুসৰি, অনলাইনযোগে কোনো অজ্ঞাত ব্যক্তিৰ সৈতে তেওঁৰ পৰিচয় হৈছিল আৰু লাহে লাহে তেওঁ এক পৰিকল্পিত ষড়যন্ত্ৰৰ জালত আৱদ্ধ হৈ পৰিছিল। অভিযোগ উঠিছে যে নিৰুদ্দেশ হোৱাৰ কেইদিনমান পূৰ্বৰে পৰা মহিলাগৰাকীয়ে পৰিয়ালৰ অজানিতে কেইবাটাও সন্দেহজনক একাউণ্টলৈ অনলাইনযোগে ধন প্ৰেৰণ কৰিছিল। আনকি এই অজ্ঞাত একাউণ্টবোৰত ধন জমা দিবলৈ তেওঁ নিজৰ সোণৰ অলংকাৰো বন্ধকত থোৱা বুলি জানিব পৰা গৈছে।

প্ৰীতি নাথ হঠাত নিৰুদ্দেশ হোৱাৰ পাছত সমগ্ৰ ঘটনাটোৱে অধিক ভয়াৱহ ৰূপ ধাৰণ কৰে। তেওঁ নিৰুদ্দেশ হোৱাৰ পাছতেই প্ৰীতিৰ নিজৰ ফোন নম্বৰৰ পৰাই স্বামীৰ মোবাইললৈ ধন দাবী কৰি ভাবুকিপূৰ্ণ বাৰ্তা আহিবলৈ ধৰে। উক্ত বাৰ্তাসমূহত উল্লেখ কৰা হৈছিল যে তেওঁক গুৱাহাটীৰ পৰা লৈ যোৱা হ‘ব। পৰৱৰ্তী সময়ত নিশা ১০:৩০ বজাত তেওঁ ৰেলযোগে গুৱাহাটী ত্যাগ কৰা বুলিও মেছেজৰ জৰিয়তে জনোৱা হয়।

আশ্চৰ্যজনকভাৱে, স্বামীয়ে লাভ কৰা হোৱাটছএপ মেছেজ আৰু ভইচ মেছেজসমূহ হিন্দী ভাষাত আছিল, যদিও প্ৰীতি মাতৃভাষাৰ বাহিৰে আন কোনো ভাষাত সাৱলীল নাছিল। এটা ভইচ মেছেজত নিৰ্দিষ্ট পৰিমাণৰ ধন আদায় নিদিলে তেওঁক হত্যা কৰাৰ ভাবুকিও প্ৰদান কৰা হৈছিল। ইয়াৰ পৰাই স্পষ্ট হৈ পৰিছে যে মহিলাগৰাকী বৰ্তমান কোনো দুষ্কৃতিকাৰী চক্ৰৰ কৱলত আছে।

পৰিয়ালৰ লোকৰ সন্দেহ যে অবধ অসম এক্সপ্ৰেছযোগে তেওঁক অসমৰ বাহিৰলৈ লৈ যোৱা হৈছে। এই সন্দৰ্ভত ইতিমধ্যে ৰেলৱে সুৰক্ষা বাহিনীকো (RPF) অৱগত কৰা হৈছে। তথ্য অনুসৰি, প্ৰীতিৰ মোবাইল নম্বৰটো বিহাৰৰ কাটিহাৰলৈকে সক্ৰিয় হৈ আছিল আৰু তাৰ পাছত সেয়া বন্ধ হৈ পৰে। পৰিয়ালে ইতিমধ্যে সকলো বাৰ্তা, ফোন নম্বৰ আৰু লেনদেনৰ বিৱৰণ আৰক্ষীক যোগান ধৰিছে। অৱশ্যে আৰক্ষীয়ে বিষয়টোত আশানুৰূপ তৎপৰতা দেখুওৱা নাই বুলি স্থানীয় ৰাইজ তথা আত্মীয়ই অভিযোগ উত্থাপন কৰিছে।অসহায় পৰিয়ালটোৱে প্ৰীতি নাথক অতি শীঘ্ৰে উদ্ধাৰ কৰিবলৈ চৰকাৰ তথা প্ৰশাসনক কাতৰ অনুৰোধ জনাইছে।