দুদিনৰ বাবে মুকলি আকাশৰ তললৈ বিধায়ক অখিল গগৈ,চেলেংহাটলৈ গৈ সাক্ষাৎ কৰিব মাতৃক
দুদিনৰ বাবে মুকলি আকাশৰ তললৈ ওলাই আহিল শিৱসাগৰৰ কাৰাৰুদ্ধ বিধায়ক অখিল গগৈ।
একাধিক গোচৰত অভিযুক্ত হৈ বৰ্তমান স্বাস্থ্যজনিত কাৰণত গুৱাহাটী চিকিৎসা মহাবিদ্যালয় চিকিৎসালয়ত চিকিৎসাধীন অৱস্থাতে বন্দী হৈ থকা অখিল গগৈক তেওঁৰ বৃদ্ধা মাতৃক সাক্ষাৎ কৰাৰ বাবে দুদিনৰ বাবে মুকলি কৰি দিলে NIA ৰ আদালতে।
সেইমৰ্মে আজি নিশা ৯ বজাৰ পিছত জিএমচিএইছৰ পৰা ওলাই আহে অখিল গগৈ। বিধায়ক গগৈয়ে তেওঁৰ বৃদ্ধা মাতৃ প্ৰিয়দা গগৈক সাক্ষাৎ কৰিবলৈ উদগ্ৰীৱ হৈ আছিল।
অখিল গগৈয়ে চান্দমাৰীৰ বাসগৃহত ইতিমধ্যে উপস্থিত হৈছে। । গুৱাহাটী চিকিৎসা মহাবিদ্যালয় চিকিৎসালয়ৰ পৰা পোনে পোনে চান্দমাৰীৰ নিজৰাপাৰৰ গৃহলৈ নিয়া হয় অখিল গগৈক।
নিশাই মাতৃক সাক্ষাতৰ বাবে নিয়া হ’ব যোৰহাটৰ বাসগৃহলৈ। প্ৰায় ডেৰ বছৰৰ অন্তত নিজৰ মৰমৰ ঘৰখনত উপস্থিত হৈছে অখিল গগৈ।
তেওঁ কটকটীয়া নিৰাপত্তা বেষ্টনীৰ মাজৰে যোৰহাটৰ চেলেংহাট গাঁৱলৈ গৈ মাতৃ প্ৰিয়দা গগৈক সাক্ষাৎ কৰিব। উল্লেখ্য চাবুৱা থানাৰ ভাৰপ্ৰাপ্ত আৰক্ষী বিষয়া এগৰাকীক ঘুঁচিয়াই দাঁত ভঙা গোচৰত অভিযুক্ত হোৱা গোচৰটো NIA ই লৈছিল।
ইতিমধ্যে, কেইমাহমান পূৰ্বে গোচৰটোত জামিন লাভ কৰিছিল যদিও অলপতে NIA ৰ আদালতে গোচৰটোৰ পৰা দোষমুক্ত কৰে কাৰাৰুদ্ধ অখিল গগৈক।
কিন্তু এতিয়াও যেন অখিল গগৈৰ ডিঙিৰ পৰা NIA ৰ কাঁইটডাল আঁতৰা নাই। এতিয়াও একাধিক গোচৰৰ পৰা মুক্ত হোৱা নাই কাৰাৰুদ্ধ অখিল গগৈ।
ৰাইজৰ দলৰ দাবী —জামিন প্ৰদান কৰি শীঘ্ৰেই ৰাইজৰ দলৰ সভাপতি তথা শিৱসাগৰ বিধানসভা সমষ্টিৰ বিধায়ক অখিল গগৈক মুক্তি দিব লাগে।
উল্লেখ্য আজি দিনৰ ভাগত অখিল গগৈৰ মাতৃ আৰু পুত্ৰক সাক্ষাৎ কৰাৰ বাবে নিয়া আদালতে আবেদন মঞ্জুৰ কৰে।
অখিলৰ হৈ অধিবক্তাই আবেদন জনাইছিল নিয়া আদালতত।
ইপিনে, চান্দমাৰী বাসগৃহত উপস্থিত হৈয়েই পুত্ৰ-পৰিবাৰক লগ পাই উৎফুল্লিত হৈ পৰে অখিল গগৈ।