Monkeypox: বৃদ্ধি পাইছে মাঙ্কিপক্সৰ সংক্ৰমণ; স্বাস্থ্য জৰুৰী অৱস্থা ঘোষণা WHOৰ

Monkeypox declared a global health emergency বিশ্বৰ বিভিন্ন দেশত অত্যন্ত সংক্ৰামক মাঙ্কিপক্স দ্ৰুতগতিত বিয়পিছে। কেইদিনমান পূৰ্বে বিশ্ব স্বাস্থ্য সংস্থাই (WHO) সতৰ্ক কৰি দিছিল যে এতিয়াই সাৱধান নহ’লে মাঙ্কিপক্সে কৰোনাৰ দৰে এক ভয়ংকৰ ৰূপ ল’ব পাৰে।

ইয়াকে লৈ বিশ্ব স্বাস্থ্য সংস্থাই এইবাৰ জৰুৰীকালীন অৱস্থা (Global Health Emergency) ঘোষণা কৰিছে।

বিশ্ব স্বাস্থ্য সংস্থাৰ হৈ সংগঠনটোৰ মুৰব্বী টেড্ৰোছ অধানম ঘেব্ৰিয়াচাছে কয়, “মাঙ্কিপক্সে সমগ্ৰ বিশ্বতে উদ্বেগ বৃদ্ধি কৰিছে। এইবাৰ ইয়াকলৈ স্বাস্থ্যক্ষেত্ৰত জৰুৰীকালীন অৱস্থা ঘোষণা কৰা হ’ল।‘’

এতিয়ালৈকে বিশ্বৰ ৭৫ খন দেশত ১৬,০০০ লোক এই ৰোগত আক্ৰান্ত হৈছে। পাঁচজন লোকৰ মৃত্যু হৈছে। মৃত্যুৰ সংখ্যা কম যদিও মাঙ্কিপক্সৰ সংক্ৰমণ ক্ষমতাই আশংকা বৃদ্ধি কৰিছে।

"So in short, we have an outbreak that has spread around the world rapidly, through new modes of transmission, about which we understand too little and which meets the criteria in the International Health Regulations."-@DrTedros #monkeypox

— World Health Organization (WHO) (@WHO) July 23, 2022

মাঙ্কিপক্স ভাইৰাছত আক্ৰান্ত লোকৰ লক্ষণবোৰৰ ভিতৰত আছে জ্বৰ, মুৰৰ বিষ, পিঠি আৰু ডিঙিত বিষ, খজুৱতি, অৱসাদ আৰু গোটেই শৰীৰত দাগ।

প্ৰথমতে চিকিৎসকসকলে  এই ৰোগটো ‘ড্ৰপলেট’ৰ জৰিয়তে বিয়পা বুলি ভাবিছিল। তেনে ক্ষেত্ৰত, শ্বাসনলী, ঘা, নাক, মুখ বা চকুৰ মাজেৰে এজন ব্যক্তিৰ শৰীৰত মাঙ্কিপক্স ভাইৰাছ প্ৰৱেশ কৰে।

অৱশ্যে এতিয়া চিকিৎসকসকলে ধাৰণা কৰে যে ভাইৰাছটো যৌন সম্পৰ্কৰ জৰিয়তেও বিয়পিব পাৰে।