মাত্ৰাধিক কৰ্মব্যস্ততা আৰু অনিয়মীয়া খাদ্যাভ্যাসৰ কুফল; মহানগৰীৰ অধিকাংশ সাংবাদিক মধুমেহ, থাইৰয়ড আদি ৰোগত আক্ৰান্ত

মুখ্য মন্ত্ৰীৰ বিনামূলীয়া ৰোগ নিৰ্ণায়ক সেৱাৰ অধীনত এম এম চি হাস্পাতালৰ উদ্যোগত অলপতে  গুৱাহাটী প্ৰেছ ক্লাবত  চলোৱা এক সমীক্ষাত মহানগৰীৰ প্ৰায় এক চতুৰ্থাংশ সংবাদকর্মী ইউৰিক এছিডৰ দ্বাৰা প্ৰভাৱিত হোৱা তথ্য পোহৰলৈ আহিছে।

একেদৰে প্ৰায় বিশ শতাংশ সংবাদকর্মী আক্ৰান্ত হৈছে মধুমেহ আৰু থাইৰয়ডজনিত ৰোগত।

তদুপৰি, প্ৰায় পোন্ধৰ শতাংশ সংবাদকর্মীৰ তেজত হিমগ্লবিনৰ পৰিমাণ কম পোৱা  গৈছে।

বিগত শনিবাৰে চিকিৎসালয়খনৰ প্ৰতিনিধিয়ে প্ৰেছ ক্লাবলৈ আহি প্ৰায় ষাঠি গৰাকী সংবাদকৰ্মীৰ তেজৰ নমুনা সংগ্ৰহ কৰিছিল। উক্ত নমুনা সমূহৰ যাবতীয় পৰীক্ষাৰ পাছত পোন্ধৰ গৰাকী অংশগ্ৰহণকাৰীৰ তেজত  ইউৰিক এচিডৰ পৰিমাণ অধিক পোৱা গৈছে।

একেদৰে, নিৰ্ধাৰিত পৰিমাণতকৈ ১৩ গৰাকী সংবাদ কৰ্মীৰ তেজত গ্লুক’জৰ পৰিমান অধিক দেখা গৈছে।

তদুপৰি, ১১ গৰাকী সংবাদকর্মীৰ তেজত থাইৰয়ড হ’ৰমনৰ পৰিমাণ  বেছি আকৌ ১৩ গৰাকী অংশগ্ৰহণকাৰীৰ তেজত হিমগ্লবিনৰ পৰিমাণ প্ৰয়োজনতকৈ কম পোৱা গৈছে।

সাংবাদিকসকলৰ মাত্ৰাধিক কৰ্মব্যস্ততা আৰু অনিয়মীয়া খাদ্যাভ্যাসৰ ফলত বিভিন্ন উপসৰ্গই  দেখা দিয়া বুলি ধাৰণা কৰিব পাৰি। সেয়েহে স্বাস্থ্যকৰ জীৱন প্ৰণালী আয়ত্ব কৰি সংগবাদকর্মীসকলে  নিজৰ দায়িত্ব সুকলমে পালন কৰিব আশা বুলি প্ৰকাশ কৰে  এম এম চি হস্পিটেলৰ  অতিৰিক্ত অধীক্ষক ডাঃ মাধৱ চন্দ্ৰ ৰাজবংশীয়ে।