ভুৱা এনকাউণ্টাৰৰ গোচৰত আৰক্ষী বিষয়াক যাৱজ্জীৱন কাৰাদণ্ড বিহিলে আদালতে
দেশত বৰ্দ্ধিত এনকাউণ্টাৰ কাণ্ডৰ সময়তে আজি এক ঐতিহাসিক ৰায় প্ৰদান কৰি নজিৰ সৃষ্টি কৰিছে বোম্বে উচ্চ ন্যায়ালয়ে। ২০০৬ চনৰ মুম্বাইত গেংষ্টাৰ ছোটা ৰাজনৰ ঘনিষ্ঠ সহযোগীৰ সন্দেহত ৰামনাৰায়ণ গুপ্তাৰ ভুৱা এনকাউণ্টাৰৰ গোচৰত এই ৰায় প্ৰদান কৰিছে আদালতে।
উচ্চ ন্যায়ালয়ে আজি মুম্বাই আৰক্ষীৰ প্ৰাক্তন বিষয়া ‘এনকাউণ্টাৰ স্পিচিয়েলিষ্ট‘ প্ৰদীপ শৰ্মাক দোষী সাব্যস্ত কৰি যাৱজ্জীৱন কাৰাদণ্ডৰ শাস্তি প্ৰদান কৰে। ন্যায়াধীশ ৰেৱতী মোহিতে ডেৰে আৰু গৌৰী গডছেৰ বিভাগীয় বিচাৰপীঠে প্ৰদীপ শৰ্মাৰ বিৰুদ্ধে এই ৰায়দান কৰে।
বিচাৰপীঠে শৰ্মাক দোষমুক্ত কৰা ২০১৩ চনৰ অধিবেশন আদালতৰ ৰায়দান বাতিল কৰি উক্ত ৰায়ক বিকৃত বুলি অভিহিত কৰে। আদালতে শৰ্মাৰ বিৰুদ্ধে উপলব্ধ প্ৰমাণক বিচাৰ আদালতে উপেক্ষা কৰা বুলিও উল্লেখ কৰে।
উচ্চ ন্যায়ালয়ৰ বিচাৰপীঠে লগতে তিনি সপ্তাহৰ পাছত শৰ্মাক সংশ্লিষ্ট অধিবেশন আদালতৰ সন্মুখত আত্মসমৰ্পণ কৰিবলৈ নিৰ্দেশ দিয়ে। তদুপৰি উচ্চ ন্যায়ালয়ে আাজি এই গোচৰৰ আন ১৩ জন দোষীৰ আজীৱন কাৰাদণ্ড বজাই ৰাখে আৰু ছয়জন অভিযুক্তক নিৰ্দোষ সাব্যস্ত কৰে।
উল্লেখ্য যে, এই হত্যাকাণ্ডৰ গোচৰত ১৩জন আৰক্ষীসহ ২২জন লোকৰ বিৰুদ্ধে অভিযোগ উত্থাপন কৰা হৈছিল। ২০১৩ চনত অধিবেশন আদালতে প্ৰমাণৰ অভাৱত শৰ্মাক দোষমুক্ত কৰি ২১জন অভিযুক্তক দোষী সাব্যস্ত কৰি যাৱজ্জীৱন কাৰাদণ্ডৰ শাস্তি প্ৰদান কৰিছিল।
এই ২১ জন অভিযুক্তৰ ভিতৰত দুজনৰ ইতিমধ্যে জিম্মাত মৃত্যু হয়। অভিযুক্তই তেওঁলোকৰ দোষী সাব্যস্ত হোৱাৰ প্ৰত্যাহ্বান জনাই উচ্চ ন্যায়ালয়ত আবেদন দাখিল কৰাৰ বিপৰীতে ভুক্তভোগীৰ ভাতৃ ৰামপ্ৰসাদ গুপ্তাই শৰ্মাৰ দোষমুক্ত ঘোষণা ৰায়ৰৰ বিৰুদ্ধে আবেদন দাখিল কৰিছিল।