ক’ৰ’না পৰাজিত; চিকিৎসালয়ত ১০০ বছৰীয়া জন্মদিন পালন কৰি সুস্থ হৈ ঘৰলৈ উভতিল মুম্বাইৰ এগৰাকী বৃদ্ধ
মুম্বাইত এগৰাকী এশ বছৰীয়া বৃদ্ধ লোকে মঙলবাৰে ক’ৰ’নাক পৰাজিত কৰি চিকিৎসালয়ৰ পৰা মুক্তি লাভ কৰে।
চিকিৎসালয়ৰ পৰা মুক্তি লাভ কৰাৰ এদিন পূৰ্বে চিকিৎসক আৰু চিকিৎসা কৰ্মী সকলে চিকিৎসালয়ত বৃদ্ধ লোক গৰাকীৰ এশ বছৰীয়া জন্মদিন উদযাপন কৰে।
ক’ৰ’না আক্ৰান্ত লোক গৰাকীক মঙলবাৰে মুম্বাইৰ হিন্দুৰিডেইছমাৰ্ট বালাচাহেব থাকৰে হাস্পাতালৰ পৰা মুক্তি দিয়া হয়।
চিকিৎসালয়খনৰ চিকিৎসক আৰু নাৰ্চ সকলে বৃদ্ধ লোক গৰাকীৰ এশ বছৰীয়া জন্মদিন কেক কাটি হাস্পাতালতে উদযাপন কৰে।
চিকিৎসালয়ৰ পৰা মুক্তি লাভ কৰা ১০০ বছৰীয়া লোক গৰাকীয়ে সিন্ধুদুৰ্গৰ এখন জিলা পৰিষদ বিদ্যালয়ত শিক্ষক হিচাপে কৰ্মৰত আছিল আৰু ১৯৭৮ চনত অৱসৰ গ্ৰহণ কৰিছিল।
ইয়াৰ পূৰ্বেও ভাৰতৰ কেইবাখনো চিকিৎসালয়ৰ পৰা ৯০ উৰ্দ্ধৰ ভালেকেইগৰাকী লোক চিকিৎসাৰ অন্তত ক’ৰ’না মুক্ত হৈ ঘৰলৈ উভতি গৈছিল।
উল্লেখযোগ্য যে, ভাৰতৰ ভিতৰতে মহাৰাষ্ট্ৰত সৰ্বাধিক সংখ্যক লোক ক’ৰ’না ভাইৰাছৰ দ্বাৰা সংক্ৰমিত হৈছে আৰু মহাৰাষ্ট্ৰৰ ভিতৰত মুম্বাইত ক’ৰ’না আক্ৰান্তৰ সংখ্যা আটাইতকৈ বেছি।
মুম্বাইত ক’ৰ’না আক্ৰান্তৰ সংখ্যা ১ লাখৰ দিশে গতি কৰিছে আৰু তথ্য প্ৰকাশ পোৱা অনুসৰি মুম্বাইত ক’ৰ’না আক্ৰান্ত হৈ মৃত্যু বৰণ কৰা লোক সকলৰ ৭০ শতাংশ লোক ৪০ বছৰৰ উৰ্দ্ধৰ।