ৰাজস্থানত কংগ্ৰেছ নেতা আৰু পৰিয়ালৰ ৪ সদস্যৰ ৰহস্যজনক মৃত্যু, ঘৰৰ ভিতৰত উদ্ধাৰ গুৰুত্বপূৰ্ণ প্ৰমাণ

ৰাজস্থানৰ আজমেৰ জিলাত কংগ্ৰেছ নেতা ৰামসিং চৌধুৰীৰ লগতে তেওঁৰ পৰিয়ালৰ ৪ জন সদস্যৰ ৰহস্যজনক মৃত্যুৰ ঘটনাই এতিয়া এক নতুন মোৰ লৈছে। ঘটনাৰ তদন্তত নামি পৰা আৰক্ষীয়ে ঘটনাস্থলীৰ লগতে মৃতদেহ উদ্ধাৰ হোৱা ঘৰটোৰ পৰাও কেতবোৰ অতি গুৰুত্বপূৰ্ণ ক্লু বিচাৰি পাইছে। উদ্ধাৰ হোৱা এই নতুন প্ৰমাণসমূহৰ ওপৰত ভিত্তি কৰি আৰক্ষীয়ে এতিয়া এয়া এক পৰিকল্পিত হত্যাকাণ্ড বুলি সন্দেহ প্ৰকাশ কৰিছে। বৰ্তমান বোৰাড়া থানাৰ আৰক্ষীয়ে সমগ্ৰ ঘটনাটোৰ গভীৰ তদন্ত চলাই আছে আৰু অতি শীঘ্ৰেই এই ৰহস্যৰ ওৰ পৰিব বুলি আশা কৰা হৈছে।

স্থানীয় ৰাইজৰ পৰা পোৱা তথ্য অনুসৰি বোৰাড়া থানা অঞ্চলৰ শ্ৰীৰামপুৰা গাঁৱৰ পৰা কিছু দূৰৈত বৃহস্পতিবাৰে পুৱা এটা পথৰ কাষত এখন এছইউভি গাড়ী জ্বলি থকা প্ৰত্যক্ষ কৰা হৈছিল। স্থানীয় ৰাইজে ততালিকে এই বিষয়ে আৰক্ষীক খবৰ দিয়ে আৰু ঘটনাস্থলীত আৰক্ষী উপস্থিত হৈ গাড়ীখনৰ পিছফালৰ চিটৰ পৰা তিনিটা জ্বলি যোৱা মৃতদেহ উদ্ধাৰ কৰে। আনহাতে এগৰাকী মহিলাৰ মৃতদেহ ওচৰৰে পথাৰ এখনত পৰি থকা অৱস্থাত পোৱা যায়। আৰক্ষীয়ে পানীৰ টেংকাৰ মাতি গাড়ীৰ জুই নিৰ্বাপন কৰে আৰু মৃতদেহকেইটা মৰণোত্তৰ পৰীক্ষাৰ বাবে চৰকাৰী হাস্পতাললৈ প্ৰেৰণ কৰে। মৃত মহিলাগৰাকীৰ ডিঙিত তেজৰ দাগ থকা বুলি আৰক্ষীয়ে জানিবলৈ দিছে।

ঘটনাৰ খবৰ পোৱাৰ লগে লগে আজমেৰ জিলাৰ জ্যেষ্ঠ আৰক্ষী বিষয়াসকল ঘটনাস্থলীত উপস্থিত হয়। আৰক্ষীয়ে যেতিয়া মৃত কংগ্ৰেছ নেতাগৰাকীৰ ঘৰৰ ভিতৰত তালাচী চলায়, তেতিয়া তাত কিছুমান আচৰিত কৰা প্ৰমাণ পোৱা যায়। ঘৰৰ ভিতৰৰ মজিয়াত তেজৰ চেকুৰা থকাৰ লগতে চোতালত থকা এটা ট্ৰেক্টৰৰ ডিজেল টেংকৰ নলীত তেজৰ দাগ লাগি আছিল। ইয়াৰ উপৰিও অপৰাধত ব্যৱহাৰ কৰা এটা চোকা অস্ত্ৰও আৰক্ষীয়ে ঘৰৰ পৰা উদ্ধাৰ কৰিবলৈ সক্ষম হৈছে। এই সকলোবোৰ চাই আৰক্ষীয়ে সন্দেহ কৰিছে যে প্ৰথমে ঘৰৰ ভিতৰতে আটাইকেইজনকে হত্যা কৰা হৈছিল আৰু তাৰ পিছত ঘটনাটোক পথ দুৰ্ঘটনাৰ ৰূপ দিবলৈ এছইউভি গাড়ীত ভৰাই জ্বলাই দিয়াৰ চেষ্টা কৰা হৈছিল।

আৰক্ষীৰ অনুসন্ধানত পোহৰলৈ আহিছে যে মৃত ৰামসিং চৌধুৰীয়ে দুখন বিয়া কৰাইছিল। তেওঁৰ প্ৰথম পত্নীৰ ফালৰ পৰা দুটা সন্তান আছে আৰু দ্বিতীয় পত্নী সুৰজ্ঞান দেৱীৰ কোনো সন্তান নাছিল। এই ঘটনাৰ সন্দৰ্ভত সোধা-পোছা কৰিবলৈ আৰক্ষীয়ে ইতিমধ্যে ৰামসিঙৰ প্ৰথম পত্নী, পুত্ৰ আৰু তেওঁলোকৰ পৰিয়ালক থানালৈ মাতি আনিছে। আৰক্ষী অধীক্ষকগৰাকীয়ে জনোৱা মতে এতিয়ালৈকে হত্যাকাণ্ডৰ প্ৰকৃত কাৰণ স্পষ্ট হোৱা নাই যদিও পৰিয়ালৰ সম্পত্তিৰ সংঘাত অথবা পুৰণি ৰাজনৈতিক শত্ৰুতাৰ বাবেই এই নৃশংস হত্যাকাণ্ড সংঘটিত হ’ব পাৰে বুলি সন্দেহ কৰা হৈছে।