নাগালেণ্ডত ৮০০০ অতিক্ৰম ক’ৰ’না সংক্ৰমিত লোকৰ সংখ্যা
নাগালেণ্ডত ক’ৰ’না আক্ৰান্ত লোকৰ সংখ্যাই মঙলবাৰে ৮০০০ অতিক্ৰম কৰে। মঙলবাৰৰ দিনটোত ৰাজ্যখনত নতুনকৈ ৬৭ গৰাকী লোক ক’ৰ’না প’জিটিভ হয়।
ৰাজ্যখনৰ স্বাস্থ্য বিভাগৰ মুখ্য সচিৱ অভিজিত সিনহাই উল্লেখ কৰা অনুসৰি মঙলবাৰে নাগালেণ্ডত মুঠ ক’ৰ’না সংক্ৰমিত লোকৰ সংখ্যা ৮০২০ গৰাকীলৈ বৃদ্ধি পায়।
নতুনকৈ ক’ৰ’না সংক্ৰমিত হোৱা ৬৭ গৰাকী লোকৰ ভিতৰত ৩৮ গৰাকী ডিমাপুৰ, ১৩ গৰাকী কোহিমা, ১১ গৰাকী টুৱেনচাং আৰু ৫ গৰাকী মুন জিলাৰ।
সিনহাই জনোৱা মতে, ৰাজ্যখনত মুঠ ক’ৰ’না সংক্ৰমিত হোৱা ৮০২০ গৰাকী লোকৰ ভিতৰত ৬২৬৭ গৰাকী লোক সুস্থ হৈ উঠিছে। বৰ্তমান ৰাজ্যখনত ১৬৫৭ গৰাকী সক্ৰিয় কোভিড ৰোগী আছে।
আনহাতে, নাগালেণ্ডত বৰ্তমানলৈ ২২ গৰাকী লোকৰ ক’ৰ’নাৰ সংক্ৰমণৰ ফলত মৃত্যু হৈছে।
নাগালেণ্ডত ক’ৰ’না সংক্ৰমিত হোৱা ৮০২০ গৰাকী লোকৰ ভিতৰত ৩৫৬৭ গৰাকী লোক নিৰাপত্তা বাহিনীৰ, ১৬১৩ গৰাকী লোক বহিঃৰাজ্যৰ পৰা উভতি অহা আৰু বাকী অংশ লোক ৰাজ্যখনৰ সাধাৰণ নাগৰিক।
নাগালেণ্ডৰ লগতে পাহাৰীয়া ৰাজ্য মণিপুৰতো ক’ৰ’নাৰ সংক্ৰমণ বৃদ্ধি পাইছে। মণিপুৰত ক’ৰ’না সংক্ৰমিত লোকৰ সংখ্যাই ১৬০০০ অতিক্ৰম কৰিছে।