দৰমহা বঞ্চিত কাগজ কলৰ কৰ্মচাৰীৰ আত্মহত্যা

দীৰ্ঘদিন ধৰি দৰমহা আৰু অন্যান্য সা-সুবিধাৰ পৰা বঞ্চিত হৈ অহা জাগীৰোডস্থিত নগাঁও কাগজ কলৰ এজন কৰ্মচাৰীয়ে আজি আত্মহত্যা কৰাৰ ঘটনা পোহৰলৈ অহাত সমগ্ৰ অঞ্চলটোতে চাঞ্চল্যৰ সৃষ্টি কৰিছে। আত্মহত্যা কৰা কৰ্মচাৰীজন বিশ্বজিৎ মজুমদাৰ বুলি জানিব পৰা গৈছে।

বিগত ২৭ মাহ ধৰি নিজৰ প্ৰাপ্য দৰমহাৰ পৰা বঞ্চিত হৈ অহা বিষয়াজনে হতাশাত ভুগি আছিল আৰু অৱশেষত উপায়বিহীন হৈ আজি আত্মহত্যাৰ দৰে চৰম পথ বাচি লয়।

নগাঁও কাগজ কলৰ বিতৰণ বিভাগৰ উচ্চ পৰ্যায়ৰ বিষয়া হিচাপে কৰ্মৰত বিশ্বজিৎ মজুমদাৰে কাগজ কলটোৰে ছিনিয়ৰ হোষ্টেলৰ এটা কোঠালীত আত্মহত্যা কৰে। কোঠালীটোৰ চিলিঙত চিপ লৈ থকা অৱস্থাত তেওঁৰ মৃতদেহটো উদ্ধাৰ কৰা হয়।

এই খবৰ বিয়পি পৰাৰ লগে লগে কাগজ কলটোত জাগীৰোড আৰক্ষীৰ লোক উপস্থিত হৈ মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰে।

উল্লেখ্য যে আজি প্ৰায় দুবছৰ ধৰি বন্ধ হৈ আছে নগাঁও কাগজ কল আৰু কাছাৰ কাগজ কল। কল দুটাৰ কৰ্মচাৰীসকলে বাৰম্বাৰ চৰকাৰক অনুনয় বিনয় কৰাৰ পাছতো কোনো ফল ধৰা দেখা নগ’ল। যাৰ পৰিপ্ৰেক্ষিতত কল দুটাত কৰ্মৰত কৰ্মচাৰীসকলে যন্ত্ৰনাময় জীৱন অতিবাহিত কৰিব লগা হৈছে।

ইফালে দৰমহা বঞ্চিত কৰ্মচাৰীজনৰ আত্মহত্যাক লৈ সচেতন মহলৰ লগতে কল দুটাৰ কৰ্মচাৰীৰ মাজত ব্যাপক প্ৰতিক্ৰিয়াৰ সৃষ্টি কৰিছে। আজিলৈ পৰিৱৰ্তনকামী চৰকাৰখনৰ ফালৰ পৰা কল দুটা পুনৰুজ্জীৱিত কৰিবৰ বাবে কোনো ব্যৱস্থা গ্ৰহণ নকৰা কাৰ্যকো ধিক্কাৰ জনাইছে কৰ্মচাৰীসকলে।