নৰ্থ-ইষ্ট এন এছ এছ মহোৎসৱ-২৬ : অসমক প্ৰতিনিধিত্ব কৰি মহাপুৰুষ শ্ৰীমন্ত শংকৰদেৱ বিশ্ববিদ্যালয়ৰ শিক্ষাৰ্থীৰ সফলতা

নৰ্থ-ইষ্ট এন এছ এছ (ৰাষ্ট্ৰীয় সেৱা আঁচনি) মহোৎসৱ- ২০২৬ ত অসমক প্ৰতিনিধিত্ব কৰি মহাপুৰুষ শ্ৰীমন্ত শংকৰদেৱ বিশ্ববিদ্যালয়ৰ ৬ গৰাকী শিক্ষাৰ্থীয়ে সফলতা লাভ কৰিবলৈ সক্ষম হৈছে ৷ বিশ্ববিদ্যালয়খনৰ লগতে, অসমৰ আন ৪ খন বিশ্ববিদ্যালয়ে এই মহোৎসৱত অসমক প্ৰতিনিধিত্ব কৰিছিল ৷ ভাৰত চৰকাৰৰ যুৱ পৰিক্ৰমা আৰু ক্ৰীড়া মন্ত্ৰালয় তথা NSS গুৱাহাটী আঞ্চলিক শাখাৰ উদ্যোগত মেঘালয়ৰ, ইউ এচ টি এমত যোৱা ২১ এপ্ৰিলৰ পৰা ২৫ এপ্ৰিললৈকে অনুষ্ঠিত এই মহোৎসৱত বিশ্ববিদ্যালয়খনৰ হৈ কীৰ্তন জ্যোতি গায়ন, চিত্ৰজিৎ ডেকা, অভিনৱ বৰা, মনশ্ৰী গোস্বামী, সুদৰ্শনা কাশ্যপ আৰু কৰিশ্মা গগৈয়ে অংশগ্ৰহণ কৰিছিল ৷

শিক্ষাৰ্থীসকলৰ লগত শিক্ষক তত্বাবধায়ক হিচাপে উপস্থিত থাকে বিশ্ববিদ্যালয়খনৰ এন এছ এছ প্ৰগ্ৰেম অফিচাৰ তথা সহ: পঞ্জীয়ক মৃণাল কুমাৰ গগৈ ।  অংশগ্ৰহণকাৰী সকলে লোকনৃত্যত প্ৰথম স্থান, বিষয়ভিত্তিক নাটকত দ্বিতীয় স্থান, শ্লোগান আৰু পোষ্টাৰ নিৰ্মাণত দ্বিতীয় স্থান আৰু সাংস্কৃতিক বিনিময়ত দ্বিতীয় স্থান লাভ কৰিছে ৷ বিশ্ববিদ্যালয়খনৰ শিক্ষাৰ্থীৰ এই সফলতাত উপাচাৰ্য অধ্যাপক অশোক কুমাৰ বৰা, পঞ্জীয়ক ড° শৰৎ হাজৰিকা প্ৰমুখ্যে সকলোৱে শিক্ষাৰ্থীসকলক শুভেচ্ছা তথা অভিনন্দন জনাইছে ৷ এই তথ্য সদৰী কৰিছে বিশ্ববিদ্যালয়ৰ এন এছ এছ-ৰ সমন্বয়ক তথা উপ পঞ্জীয়ক (শৈক্ষিক) ড° বিচিত্ৰ বিকাশে ৷